DILI, STLTIMORLESTE.com – Diresaun Nasionál Transporte no Terrestre (DNTT) hamutuk Diresaun Tránzitu Seguransa Rodoviaria Nasionál (DTSRN) hasai ona sirkular konjunta ba públiku, hodi regula ema neebe kondus motor elétrika ka scooter tenke ho idade tinan 16 no tenke iha karta kondusaun ho kategoria A1.
Nia dehan, ba labarik sira neebe kontinua utiliza motor elétriku ka scooter sei prende no aplika lei ka regra tránzitu nian. Tanba daudaun nee labarik barak mak kondus scooter iha estrada publiku neebe bele fo ameasa ba sira nia vida no mos perturba movimentasaun rodoviária. Ho nunee, Diresaun Nasional Transportes Terestres hamutuk ho Diresaun Tránzitu Seguransa Rodoviária fo hatene ba komunidade tomak, liu-liu ba inan-aman sira katak, labele autoriza oan sira ho minoridade kondus scooter iha estrada públiku.
“Komunikadu konjunta mós ami fó sai tiha ona atu nunee husu ba komunidade no labarik sira labele kondús Scooter iha estrada públiku,” hateke Diretora Nasionál Transporte no Terrestre (DNTT), Maria Antónia Vitór da Costa ba jornalista sira iha nia knaar fatin Balide Dili, Kinta (26/02/2026).
Nia esplika, labarik sira kondus scooter nee fo ameasa ba sira nia vida, aleinde nee mos sira halo perturbasaun movimentasaun rodoviaria.
“Ami sei halo pasa revista (sweeping) no mos operasaun konjunta, tanba baibain ita haree iha plenaria Deputadu sira sempre foti ida nee, ita haree katak minoridade sira neebe mak kondús Scooter neebe fo risku ba sira nia vida no perturba mós movimentu transporte iha estrada públiku,” nia informa.
Nia hatutan, DNTT iha ona planu bazeia ba Dekretu Leí 64 kona-ba importasaun sei kona-ba scooter sira nee no depois bele implementa atu motorista sira utiliza kapasete, karta kondusaun no dokumentu.
Nia rekonhese iha munisípiu barak, mak liu-liu iha Kovalima no Bobonaro iha parte Atabae nian haree katak motor eletriku sira nee barak halo movimentu iha estra públiku.
“Ita sei koordenasaun ho polísia tránzitu ninian sei halo atuasaun to’o ba munisípiu sira,” nia koalia.
Iha sorin seluk, Diretór Tránzitu Seguransa Rodoviaria Nasionál (DTSRN), Superintendente Xefe Polísia António Mauluta deklara iha nia knaar fatin Komando Jeral PNTL haktuir, foin lalais sira halo sosializasaun hamutuk ho DNTT iha Manatuto alerta katak tuir artigu Leí tránzitu nian 120° bandu minoridade utiliza motor.
“Oras nee sirkular lao daudaun ami sei determina tan loron para oinsa ami halo operasaun, maibe kalan balun ita halo ona no balun ita prende ona,” nia hatoo.
Nia afirma, atu uza kondus scooter tuir DNTT ba ema neebe adultu no tenke iha karta kondusaun no trata dokumentus hanesan motór baibain.
(jen)
