DILI, STLTIMORLESTE.com – Prezidente Republika (PR), Jose Ramos Horta hasoru malu ho Diretor Organizasaun Mundial Saude (OMS), Tedros Adhanom Ghebreyesus, hodi deskute assuntu importante ligadu ho Saude Mundial liu-liu TBC.
Kestaun nee hatoo husi Prezidente Republika, Jose Ramos Horta ba jornalista sira bainhira remata vizita estadu ba Jenebra no Fransa fila hikas mai Timor Leste iha Aeroportu Internasional Nicolau Lobato, Bairo Pite, Sesta (27/02/2026).
Xefe Estadu hatete, durante vizita iha Jenebra Prezidente Republika Jose Ramos Horta hahu sesaun annual segmentu altu nivel, halo enkontru ho Diretor Jeral OMS hodi koalia konaba Saude mundial liu liu oinsa bele prevene TBC.
“Hau Uniku Xefe Estadu neebe koalia ho sekretariu jeral onu Prezidente konsellu Direitus Umanus, no komisariu halo intervensaun hotu hotu hatene ona enkontru mos ho OMS Diretor Jeral, tanba iha Timor Leste ho organizasaun Mundial Saude OMS ho Governu liu husi Ministeriu Saude atu lansa programa ida importante tebes konaba TBC,” dehan PR Horta.
Prezidente Republika hatete, problema boot neebe iha Timor Leste mak Kona-ba dengue, maibe TBC mos iha Timor Leste tinan tinan problema nee mosu.
“Moras nee infeksaun makaas iha uma laran, ema ida ho moras TBC familia tomak hetan, ida nee mak ami koalia oinsa mak mobiliza finansiamentu ba programa ida nee,” dehan PR Horta.
Xefe Estadu hatete, iha Jenebra iha programa rua, ida mak halo diskursu iha Konselhu Direitus Umanus depois kontinua halo enkontru ho Diretor Jeral OMS oinsa mak bele kombate mos TBC, ida nee inisiativa halo ona husi Governu TL ho OMS.
Depois liu ba Fransa nee tanba hetan konvite husi Prezidente Franses, ida nee ba hasoru terseiru ves, no premeiru ves iha 2024 Paris segundu ves iha Singapura konferensia Sharila Terseiru iha Timor, relasaun TL ho fransa aumenta.
Intrese ekonomiku Franses forte hahu ho porto Tibar kompanha boot husi Fransa mak kontratu no sira mak agora halo jestaun ba porto Tibar, alende ida nee kompanha boot seluk konaba enerjia solar ho kompanhia Japoneza halo projetu ida iha Laleia daudaun nee halo daudaun ona akordu ho Governu halo investimentu fornese enerjia ba estaleiru naval Laleia.
Prezidente Republika Jose Ramos Horta halo enkontru ho Diretor Jeral OMS hametin kooperasaun, Estratejika Saude. Iha sede Organizasaun Mundial Saude (OMS) ho Diretor Jeral Tedros Adhanom Ghebreyesus hodi konsolida parseira estratejika entre Timor Leste no organizasaun saude mundial nee.
Tedros fo parabens ba Prezidente kona-ba Timor-Leste nia susesu istoriku hodi erradika malaria no resposta ezemplar ba Covid-19, neebe konsege kobre vasinasaun porsentu 80. Akompanha husi Ministru Negosiu Estranjeiru no Kooperasaun, Bendito Freitas, Xefe Estadu reafirma Timor Leste nia kompromisu ba multilateralizmu no fo louvor ba. Tedros nia “lideransa briliante” durante krize global neebe seidauk akontese antes.
Prezidente Ramos Horta asegura apoiu OMS nian hodi foka ba emerjensia saude atual sira, liu-liu husu atu inklui Timor Leste iha programa aksesu sedu ba vasina foun kontra dengue hodi kombate surtu severu iha tempu udan.
Diskusaun nee mos foka ba drama boot tuberkuloze nian no kazu moras la hadaet neebe aumenta hanesan diabetes no moras sira neebe mai hosi tabaku,” dehan husi Komunikadu neebe STL asesu kuarta (25/02/2026).
Líder nain rua konfirma sira-nia partisipasaun iha Enkontru Komite Regional OMS ba dala-79 neebe sei halao iha Díli iha Setembru nee, no Prezidente estende konvite pesoal ba Tedros hodi halao vizita ofisial istoriku ida nee ami kapital Dili.
Enkontru nee termina ho diskusaun neebe luan liu kona-ba dezenvolvimentu nasional no kredibilidade internasional, neebe Prezidente foti kestaun independensia finanseira Timor Leste nian, Fundu Petrolíferu neebe sustentavel, no parseira estratejika ba infraestrutura ho Japaun, Australia, no Emiradu Arabes Unidus (EAU). Reafirma mos nasaun nia lideransa iha ambiental no projetu enerjia Greater Sunrise neebe sei mai, Prezidente Ramos Horta mos halao “diplomasi kafe,” hodi oferese kafe timoroan ba Dr. Tedros hanesan símbolu patrimoniu uniku nasaun nian.
Diretor-Jeral garante ba Prezidente katak reestruturasaun OMS neebe lao hela sei la fo impaktu ba OMS nia prezensa forte iha Timor-Leste, hodi asegura apoiu tekniku kontinuu ba prioridade saude nasaun nian.
(eme)
