DILI, STLTIMORLESTE.com – Prezidente Ramos Horta anunsia data ba Maratona Internasional Dili 2026 no Lansa Website Ofisial ho Tema Foun “Hadomi ita nia Ai-laran no ita-nia Balada Fuik”.
Prezidente Republika, Jose Ramos Horta nuudar patronu ba Maratona Internasional Dili, ohin sesta (27/02/2026) anunsia data ofisial ba epoka maratona tinan 2026 nian no lansa mos saite (website) ofisial ba eventu nee iha www.dilimarathon.tl. Tinan nee marka pasu istorika ida, tanba IX Governu Konstitusional, liu husi Gabinete Prezidente, Ministeriu Juventude no Desportu, hamutuk ho Ministeriu Turizmu, simu Federasaun Atletizmu Timor Leste servisu nuudar parseiru xave ba eventu nee.
Iha tema foun Hadomi ita nia Ai-Laran no ita nia Balada Fuik (Love Our Forests and Wildlife), edisaun 2026 nian sei foka liuba selebrasaun no protesaun ba Timor Leste nia biodiversidade, flora no fauna neebe furak. Eventu nee iha objetivu atu laos deit koalia kona-ba desportu, maibe atu sai mos hanesan kampaña nasional ba konservasaun ambiental no protesaun ba eransa natural.
“Maratona Internasional Dili nee laos deit kores-fatin ida ida nee selebrasaun ida ba ita-nia nasaun nia espíritu no, agora, sai hanesan mos kompromisu ida ba ita-nia futuru,” dehan Prezidente Ramos-Horta. “Hodi halai ba ita-nia ai-laran no balada fuik, ita rekoñese katak ita-nia eransa natural iha valor hanesan ho ita-nia potensia iha desportu. Ita konvida mundu atu halai hamutuk ho ita, laos deit ba susesu pesoal, maibe atu ajuda proteje ekosistema uniku neebe halo Timor-Leste sai kmanek tebes,” dehan PR Horta.
Estrutura Foun ba Epoka Eventu rua atu prepara diak liutan atleta sira no teste sistema foun sira, epoka 2026 sei iha eventu boot rua neebe la hanesan, Eventu Selesaun Nasional (Meia Maratona): 9 Maiu 2026.
Maratona Internasional Dili (Eventu Prínsipal) 8 Agostu 2026 Inisiativa Istorika no Profisionalizasaun Haree hosi susesu edisaun 2025 nian “Halai ba Palestina” (Run for Palestine), maratona 2026 nian aprezenta dezenvolvimentu tekniku boot balu hodi hasae kualidade eventu nee nian ba padraun mundial.
Sistema RFID (Electronic Timing System) Implementasaun chip eletroniku profisional ba tempu nian hodi fo rezultadu neebe loloos. Rute Foun iha Tasi-Ibun: Dezeña foun rute neebe hetan ona sertifikasaun internasional hodi hatudu Dili nia tasi-ibun no redus mos trafiku iha sidade laran.
Rejistu Online: Sistema rejistu dijital komprensivu neebe sei loke iha Marsu 2026 iha www.dilimarathon.tl. “
Nunee mos Afriano Amaral, Prezidente Federasaun Atletizmu Timor-Leste hatete Tinan nee reprezenta mudansa boot ba atletizmu iha TL.
“Ho apoiu hosi Governu no ita nia Patronu, Prezidente Ramos Horta, ita profisionaliza hela ita nia infraestrutura teknika atu fo dalan neebe klaru no sertifikadu ba atleta Timor-oan sira hodi kualifika ba Jogus Olímpiikus iha ita nia rai rasik,” dehan nia.
Parseiru Benefisiariu no Impaktu Ambiental Eventu nee orgullu tebes atu servisu hamutuk ho organizasaun ambiental rua neebe lidera iha sira-nia area, JRH Resilience Fund (Fundu Reziliensia no Asaun Klimatika Jose Ramos-Horta), neebe apoia komunidade rural sira liuhosi pratika kuda ai-hun sustentavel no kuda karbonu (carbon farming). PERMATIL (Permakultura Timor Leste), neebe hametin komunidade sira liuhosi agrikultura sustentavel, konservasaun bee, no edukasaun ambiental.
Eventu nee hein atu simu partisipante nain 7,000 resin, inklui mos korredor internasional nain 500 resin. Korredor sira sei iha oportunidade atu apoia direita projetu kuda ai-oan no konservasaun bee liuhosi Fundu Reziliensia JRH no PERMATIL.
Partisipasaun no Kalendariu Rejistu nakloke ba idade hotu-hotu no ba ema hotu. Janeiru 2026: Lansa Tema Ofisial Fevereiru 2026: Lansa Saite (Website) Marsu 2026: Loke Rejistu 9 Maiu 2026: Eventu Selesaun Nasional 8 Agostu 2026: Maratona Internasional Dili
Sponsor sira neebe iha interese atu apoia eventu nasional nee bele kontaktu komisaun organizadora liuhosi email info@dilimarathon.tl. Atu hetan informasaun foun sira, bele tuir eventu nee nia pagina Facebook iha @Dili Marathon. Kona-ba Maratona Internasional Dili
Estabelese iha tinan 2010 nuudar parte hosi kampaña “Dili Sidade ba Dame” (Dili City of Peace), Maratona Internasional Dili hanesan eventu desportu internasional ida neebe halao kleur ona iha Timor Leste. Eventu nee sai hanesan plataforma ida ba unidade nasional, harii paz, no kualidade desportu nian, hodi dudu atleta maratona Timor sira ba palku Olímpiiku nian.
(eme)
