COVALIMA, STLTIMORLESTE.com – Prezidensia Republika (PR) lansa fatuk dahuluk hodi halo kontrusaun uma dignu ida ba sidadaun defisiensia Olanda Maria de Jesus Ernestina ho oan nain 5 iha Suku Camenaca, Munisipiu Covalima.
Prezidente Republika liu husi Assesor Prezidensia Republika, Quintiliano Moniz iha loron sesta (27/02/2026) lansa fatuk dahuluk iha Suku Camenaca, Munisipiu Covalima, hodi tulun sidadaun Olanda Maria de Jesus Ernestina ho nia oan nain 5 neebe durante nee hela uma la dignu.
“Ohin ita mai lori Prezidente ho Governu nia naran hamutuk ho komunidade sira, komadante Polisia Munisipiu Covalima ho autoridade lokal halo lansamentu fatuk dahuluk ba familia ida nee, ho total orsamentu neebe iha kobre hotu ho kios ida ho sasan uma laran hanesan baibain nee 14 mil resin,” dehan Asesor Prezidente Republika ba jornalista iha Covalima, Sesta (27/02/2026).
Asesor Prezidensia Republika hatete, iha fulan Janeiru too Marsu halo uma remata ho ida nee, maibe planu tinan ida nee mak apoiu reabilitasaun eskola no kapela sira tanba proposta tinan uluk eskola balun grave no kapela balun kontribuisaun direita mai husi komunidade, entaun prezidensia mos kontribui material balun para finaliza kapela sira nee.
Prezidente Republika iha esforsu kontinua atu harii uma neebe dignu ba sidadaun vulneravel sira iha nasaun laran, inisiativa sosial husi Prezidente Republika, Jose Ramos Horta too ona iha Munisípiu Covalima, tanba nee husi Unidade Servisu Sosiedade Sivíl no Asuntu Sosial Prezidensia Republika halao ona lansamentu fatuk dahuluk ba uma foun ida iha suku Camenaca.
Lansamentu husi Assesor Prezidensia Republika, Quintiliano Moniz neebe reprezenta Prezidente Republika, ho kompromisu Prezidensia nian atu hadia kondisaun moris ba sidadaun defisiensia ho nia oan nain 5 neebe durante nee tempu udan tur iha udan laran laran.
Uma modernu sira nee, ho medida 8×7 metru no iha kuartu tolu, reprezenta investimentu total hamutuk US$ 14.511 ba uma idak-idak, neebe kobre mos ba konstrusaun, mobiliariu no instalasaun uma laran nian neebe esensial. Konstrusaun sei remata iha fulan tolu too haat nia laran, hodi fo uma neebe dignu ba família nee.
Nunee mos Xefe Suku Camenaca, Fernando Noronha hatete, nuudar aman ba suku nee hatoo agradese ba Prezidente Republika neebe ho laran luak bele halo ona lansamentu fatuk dahuluk hodi halo konstrusaun uma dignu ba nia sidadaun nee.
“Sente kontente tanba husi Gabinete PR ho domin neebe boot ho tempu ida nee realiza duni fatuk dahuluk iha fatin ida nee, hau nuudar aman hau kontente tebes, ba oin hau mos haree ba komunidade neebe vulneravel sei buka dalan hodi hatama proposta ruma tulun komunidade sira, tanba balun sei vulneravel,” dehan Xefe Suku.
Nia hatete, antes nee Xefe Suku rasik halo esforsu hatama proposta hodi tama dirize ba Gabinete Prezidente Republika ikus Prezidente Republika responde duni pedidu neebe Xefe hatama.
“Hau nia komunidade nee ho kondisaun defisiensia nia tuur iha fatin deit book aan ladiak, no oan feto nain 3 mos sei kiik hela mane nain rua mak boot ona, tanba nee domin husi hau hatoo proposta no domin husi estadu tulun,” katak Xefe Suku.
Autoridade lokal nee dehan, sidadaun nee kondisaun defisiensia no nia katuas husik hela mesak, antes kondisaun diak sei hamutuk maibe moras ona katuas oan lao husik hela.
Nunee mos benefisiaria defisiensia Olanda Maria de Jesus Ernestina ho mataben hatoo agradese ba Prezidente Republika liu husi ekipa neebe halo ona lansamentu ba nia uma, tanba tinan barak nia ho oan sira hela uma neebe la.dignu.
“Hau sente kontente, tanba ajuda ona hau, uma nee kuandu udan tama deit, hau lori terpal taka netik deit,” katak nia.
Nia mos konta katak nia laen husik hela nia iha 2022 no oan nain 5 feto nain rua no mane nain 3, maibe mane ida hela ho nia aman iha Likisa.
Nunee mos maun husi benefisiaria, Marcelo Esnetino. Hatete sente kontente ohin Prezidente Republika bele tulun hela nia alin tanba durante nee laiha ema ida tau matan so Prezidente mak rona nia alin nia halerik. “So prezidente deit mak tau matan tanba nee hau sente kontente,” dehan nia.
Nia mos konta katak durante nee hetan mos apoiu balun husi parte defisiensia nia inklui mos sosial maibe dala ruma deit.
Nia hatete nia mos tau matan ba nia alin defisiensia ho nia alin sira, liu husi peskas karik hetan osan ruma bele sosa hahan sustenta nia alin ho oan nain 5.
(eme)
