COVALIMA, STLTIMORLESTE.com – Tempu badak Prezidente Republika (PR), Jose Ramos Horta sei fo apoiu uma dignu ida ba inan Maria da Costa belo neebe durante nee hela iha fatuk koak iha Aldeia Lulihene, Suku Bocuoli, Postu Administrativu Baucau Vila, Munisipiu Baucau.
Lia hirak nee hatoo husi Assesor Prezidensia Republika, Quintiliano Moniz ba jornalista sira iha Kovalima, Sesta (26/02/2026) hatete, tempu besik sei halo mos lansamentu fatuk dahuluk ba inan ida neebe hela iha fatuk koak iha Suku Bocuoli, inklui mos maun defisiensia ida neebe durante nee tuur deit iha estrada ibun Venilale nia.
“Ida kona-ba ita nia inan ida hela iha fatuk koak iha Baucau nee iha suku Bocuoli, nia prosesu orsamentu seidauk aprova, agora prosesu hela uza orsamentu 2026 nian, daudaun ita uza nee uza orsamentu 2025,” dehan Asesor.
Asesor dehan, daudaun nee orsamentu atu halo kontrusaun uma dignu nee prosesu ona, kuandu aprova ona iha fula ida ka rua sei halo lansamentu fatuk dahuluk hodi halo kontrusaun uma dignu ba sidadaun ida neebe mak durante nee hela deit iha fatuk koak iha Suku Bocuoli nian.
“Ninia ita aselera ona para nia prosesu orsamentu bele fulan oin, ou fulan ida rua tan ita bele ba halo ona lansamentu ba ninia uma,” katak nia.
Asesor dehan, orsamentu neebe sei halo uma dignu ba sidadaun neebe mak hela iha fatuk koak nee orsamentu hanesan mos komunidade vulneravel seluk neebe durante nee Prezidente apoiu halo uma dignu.
“Orsamentu hanesan, hotu-hotu nee pakote ida, balun nee dala ruma orsamentu sae oituan tanba ita haree husi mobilizasaun material dala ruma fatuk ho rai henek nee dook tanba nee mak orsamemtu nee aumenta, maibe ida neebe fatuk ho rai henek besik bele kobre US$ 14 mil ital kobre hela,” dehan Asesor.
Asesor dehan, kona-ba inan ida neebe hela iha fatuk koak iha Bocuoli nee kuandu orsamentu aprova ona ekipa Prezidensia Republika lansa ona fatuk dahuluk.
“Kuandu aprova ona ita ba halo ona, maibe labele promete aban bainrua ita la ba entaun ita mate, uma nee uza Orsamentu Jeral Estadu 2026, maibe proposta aprova iha 2025 soke iha tempu neeba sira la konsege prosesu entaun dada tempu too mai agora, maibe nia orsamentu agora prosesu,” dehan asesor.
Nia hatete, Prezidensia Republika konfirmadu halo uma rua iha Munisipiu Baukau, ida mak inan ida neebe hela fatuk koak iha Bocuoli, ida tan mak aman defisiensia ida neebe babain tuur iha dalan Venilale husu osan nee, ida nee hein deit prosesu orsamentu sei halo fulan ida ka rua tan.
(eme)
