COVALIMA, STLTIMORLESTE.com – Komunidade iha Suku Camanaca neebe lokaliza iha Munisipiu Covalima preokupa ho estrada, maske sira nia suku iha sede CNRT.
Kestaun nee hatoo husi Komunidade Camanaca hanesan mos Lia Nain Aldeia Manequin, Francisco Goncalves Babo ba jornalista sira iha Camanaca, Sesta (27/02/2026).
Nia hatete, buat seluk sira la preokupa maibe preokupa liu mak estrada, iha suku seluk estrada diak ona maibe iha Suku Camanaca maske sede CNRT rasik iha neeba maibe estrada la diak, tanba nee nia husu Governu atu hadia.
“Liu liu Aldeia Manequin nee seidauk aspal, tanba nee karik bele loke tan estrada halo luan no halo ba aspal iha Suai Loro aspal ona maibe husi Suku Camanaca liu-liu aldeia sira nee seidauk aspal, tanba nee husu Governu tau matan, iha nee iha sede CNRT maibe ita haree ba estrada mos la diak, se bele karik IX Governu Konstitusional bele hadia estrada tanba sede CNRT rasik iha nee, iha aldeia Manequin no Aldeia Camanaca,” dehan lia nain.
Nia hatete, iha Suku Camanaca preokupa liu mak estrada maibe kona-ba eletrisidade bee moos sira nee laiha problema, tanba nee nia husu estadu nomos Governu liu-liu IX Governu Konstitusional neebe lidera husi Primeiru Ministru Kay Rala Xanana Gusmão atu bele hadia estrada.
Nunee mos Xefe Suku Camenaca, Fernando Noronha hatete, Suku Camenaca kompostu husi aldeia 4, kona-ba bee moos sufisiente hela, no eletrisidade mos maioria asesu ona maibe preokupa liu mak estrada.
“Durante nee preokupa liu mak estrada, maibe ida nee hau buka dalan nafatin oinsa hatama proposta ruma hodi lori ba nasional,” katak Xefe Suku.
Husi aldeia 4 nee ida neebe mak too oras nee seidauk asesu ba estrada no estrada grave liu? hatan ba kestaun Xefe Suku hatete, ida neebe grave maki ha aldeia Ailok laran Manekin fatuisi ho mos samfuk.
Nia hatete, iha Aldeia Samfuk estrada aat no simiteiru iha aldeia refere tempu udan iha lia mate ruma, komunidade sira susar atu lori mate isin ba prosesu funebre, tanba nee husu estadu bele ajuda hadia netik estrada neebe komunidade sira halerik tempu naruk nia laran.
Komunidade Suku Camenaca total populasaun 5.113, suku nee kompostu iha Aldeia 4 mak Aldeia Samfuk, Fatuisin, Manequin, ho Ailok laran. Komunidade maioria moris ho Agrikultura no peskas.
(eme)
