DILI, STLTIMORLESTE.com – Tribunal Judisial Primeira Instansia Dili (TJPID) halao prosesu primeiru interogatoriu ba arguidu hamutuk nain 7, tanba deskonfia envolve iha krime Roubu neebe akontese iha Bekora.
Arguidu nain 7 ho inisial, D, B, I, L, R, J, L.
Iha sala julgamentu laran, Juiz turnu halo tiha identifikasaun ba arguidu sira, no husu Ministeriu Publiku no mos defeza atu tama ba iha faze alegasaun.
Iha alegasaun Prokurador Bartolomeo de Araujo husu Tribunal atu aplika Medida Aprezentasaun Periodika ba arguidu nain 7, hodi asegura prosesu investigasaun.
Enkuantu husi parte Defeza Sergio Dias Quintas husu Tribunal atu aplika medida Termu Indentidade Rezidensia ba arguidu nain 7.
Rona tiha alegasaun, ikus mai Juiz turnu deside aplika medida Termu Identidade Rezidensia (TIR) ba arguidu nain 7.
“Tribunal aplika medida koasaun TIR ba sira hodi hein investigasaun tuir mai nee, tanba promosaun Ministeriu Publiku imputa ba sira ho krime Roubu iha artigu 253 husi Kodigu Penal,” dehan Defeza Sergio Dias Quintas ba STL iha Kaikoli, Domingu (08/03/2026).
Nia esplika, hanesan defeza sei la aprezenta rekursu, tanba medida koasaun nee kmaan liu, parese MP mak sei halo rekursu ba despaisu Juiz nian nee.
iha alegasaun defeza husu TIR, no ikus mai Juiz haree katak, sira pratika krime refere iha indisiu intermediu, tanba nee mak Tribunal aplika TIR nee.
Nia dehan, iha indisiu sira pratika krime Roubu, liga ho objeitu krime mak bibi, maibe segredu justisa iha prosesu investigasaun mak foin haree lo-loos.
Prosesu Primeiru interogatoriu nee prezide husi Juiz Estajiadu nain ida, Ministeriu Publiku reprezenta husi Prokurador Bartolomeo de Araujo, arguidu hetan asistensia legal husi Defensor Publiku Sergio Dias Quintas.
(ter)
