DILI, STLTIMORLESTE.com – Hafoin udan boót neebe akontese iha loron 08 Marsu 2026, iha zona livre fronteira entre Timor Leste no Indonezia rezulta erozaun neebe fo impaktu hodi taka metin ponte, estrada no valeta iha aredores Batugade intupidu.
Tuir komunidade imprensa husi media Ministeriu Interior neebe STL asesu katak, Ministru Interior (MI) Fransisco da Costa Guterres akompanha husi Sekretariu Estadu Protesaun Sivil, Domingos Mariano Reis, Prezidente Autoridade Protesaun Sivil, Jesuino dos Reis Matos Carvalho, Diretora Ezekutiva Servisu Migrasaun, Natercia Eufrasia Martins hamutuk ho ekipa Bombeiros Nasional no Munisipal halo kedas intervensaun hodi fase estrada protokolu neebe nakonu ho tahu nurak iha aredores Postu Intergradu Fronteira.
Iha biban nee, Ministru Interior orienta mos ekipa Unidade Espseial Protesaun Sivil no IGE-ADI tun direita ho ekipamentu pezadu hodi normaliza hikas fatin risku ba dezastre sira hodi suru sai ai monu no tahu ne’ebé nakonu iha ponte okos.
Enkuantu tuir previzaun tempu hosi meteorolojia nasaun rua nian katak, sei iha anin no udan ho intensidade bot sei akontese iha too loron 12 marsu 2026, nunee alerta ba komunidade sira atu hadok an hosi forsa natureza ida ne’e.
Oras nee daudaun Ministru Interior Francisco da Costa Guterres, orienta ona ekipa Unidade Espesial Protesaun Sivil, Korpu Bombeiro Maliana, Unidade Patrullamentu Fronteira no IGE-ADI kontinua halo normalizasaun ba moru protesaun neebe hetan estragu no sei indentifika tán fatin balu neebe sai risku ba indundasaun hodi normaliza hotu kedas. Enkuantu Ekipa Bombeiros mos hasai estrutura neebe konsidera perigu ba públiku no kontinua tesi ai neebe mota lori hodi fo espasu ba sirkulasaun mota bele liu.
(jen)
