AINARO, STLTIMORLESTE.com – Estudante husi Eskola Esninu Sekundaria Katolika Santa Maria Ainaro ezije promete ida ba Ministra Edukasaun (ME) iha Primeiru Ministru (PM) Kay Rala Xanana Gusmão nia oin.
Iha ambitu vizita ofisial Primeiru Ministru nian tuir programa “Haree besik servisu munisipal husi rezultadu avaliasaun ba kondisaun manima” iha Munisipiu Ainaro neebe realiza iha loron 10 Marsu nee akompanha husi Ministra Edukasaun no membru Governu seluk tan, iha neebe sesaun husu no estudante feto ida husi eskola Esninu Sekundaria Katolika Santa Maria Ainaro, Sandra Araújo Gama aprezenta preokupasaun kona-ba promete neebe Ministru Edukasaun husi hela iha eskola refere.
Promete neebe Ministru Edukasaun fo ba eskola refere iha tinan 2024 no too ona tinan 2026 maibe promete refere Ministra rasik seidauk realiza, nunee estudante refere aproveita oportunidade haktuir Ministra Edukasaun nia promete iha Xefe Governu nia oin.
“Nia promete ba ami iha tinan 2024, momentu nia ba vizita ami nia eskola, hau ho hau nia kolega ida dehan, ami laiha laboratoium ami relata preokupasaun nee ba Ministra, Ministra dehan sei lori mai, nia liafuan sai tiha ona mais asaun ho realidade seidauk mosu,” Estudante nee hateten ba STL iha resintu salaun Parokia Nossa Senhora de Fátima Ainaro hafoin remata aprezenta preokupasaun ba Ministra Edukasaun iha MP nia oin, Tersa (10/03/2026).
Sandra Araújo Gama katak, estudante sira iha eskola refere prezisa ekipamentus ba pratika estudu laboratoium nian, maibe husi inisiu too ohin loron eskola refere seidauk iha ekipamentus ba pratika estudu laboratoium nian.
Tanba nee husu Ministeriu Edukasaun atu apoiu ekipamentus laboratoriu, nunee bainhira termina estudu iha nivel eskola sekundaria atu kontinua iha ensinu superior bele kompleta liu tan pratika hirak neebe aprende ona iha ensinu sekundaria.
“Ami sente prekupadu liu tanba ami balu tamat tiha ona maibe laiha esperensia, se karik ami ba universidade foti laboratoium bainhira mak ami aprende fali husi bazika nee, tanba durante nee ami laiha pratika,” estudante nee espera.
Iha Primeiru Ministru Kay Rala Xanana Gusmão nia oin, Ministra Edukasaun Dulce de Jesus hatan no fo parabens ba estudante refere, tanba konsidera matenek aprezenta preokupasaun refere iha publiku nia leet.
“Hau toma nota ba nia observasaun la eskola hotu hotu iha Ainaro iha hotu ona laboratorium, laboratorium nee mos programa Governu nian maibe ita halo fazeadamente, neebe menina lalika triste hau toma nota ba ita boot nia ideia nee,” Ministra Dulce katak.
(tom)
