AINARO, STLTIMORLESTE.com – Estudante no profesores sira iha eskola Ensinu Baziku Central (EBC), Venâncio Ferraz Ainaro kontente simu Primeiru Ministru (PM) Kay Rala Xanana Gusmão.
Iha vizita ofisial Primeiru Ministru nian iha Munisipiu Ainaro atu partisipa atividade “Haree besik servisu munisipal husi rezultadu avaliasaun ba kondisaun manima” neebe realiza iha Ainaro Tersa nee, Xefe Governu Kay Rala Xanana Gusmão ho komitiva marka prezensa eskola refere hodi haree programa merenda eskolar no fahe hahan ba estudante sira.
Iha ambitu vizita nee, Diretora eskola EBC Venâncio Ferraz Ainaro, Silvêra Maria de Araújo aprezenta programa merenda eskolar neebe implementa iha eskola refere ba Xefe Governu katak, durante implementasaun merenda eskolar iha eskola refere lao ho diak.
Enkuantu iha vizita nee, estudante Cristiana Sarmento Miranda Pereira espresa sentimentu kontente bainhira PM Kay Rala Xanana Gusmão marka prezensa iha sira nia eskola, tanba fahe hahan programa merenda eskolar ba estudante sira.
“Ami sente kontente tanba Avo Nana mai haree merenda ho diak no ami mos agradese ba Avo Nana fo ona merenda ba ami iha eskola ida nee,” hateten estudante Cristiana Sarmento Miranda Pereira ba jornalista sira iha ambitu PM Xanana fahe hahan husi programa merenda eskolar ba estudante sira iha eskola EBC Venâncio Ferraz Ainaro, Tersa (10/03/2026).
Estudante nee konhese PM Kay Rala Xanana Gusmão nuudar lutador no Aswain Timor nian, maibe simplisidade tebes, tanba nafatin hakbesik aan ba nia komunidade labarik sira.
Estudante nee konsidera, Xanana mak ema matenek Timor nian neebe prezensa iha eskola refere nuudar motivasaun ida ba estudante sira atu banati tuir.
“Uluk nuudar funu nain ida ukun rai ida nee, prezensa iha eskola nuudar matenek nain ida motiva tebes ami atu estuda,” estudante Cristiana argumenta.
Iha fatin hanesan, estudante Eduardo Lopes espresa kontente iha ambitu prezenta PM Kay Rala Xanana Gusmão iha eskola refere, tanba nee promete atu estuda makaas atu lidera nasaun iha futuru mai.
“Ami estudante tenke mai eskola, ami jovem prezisa estuda para hodi bele ba futuru oin mai ami bele troka sira,” estudante nee promete.
Entretantu iha vizita Primeiru Ministru Kay Rala Xanana Gusmão nian iha eskola refere, estudante sira simu ho haklalak no hakbesik aan hodi bensa lider rezistensia nee.
(tom)
