DILI, STLTIMORLESTE.com – Ministra Solidariedade Sosial no Inkluzaun (MSSI), Veronica das Dores husu ba kargu diretores no xefia husi nasional too munisipiu neebe ohin simu tomada de pose servisu ho responsabilidade.
Ohin MSSI marka istoria, kargu xefia sira simu tomade de pose ho juramentu kompromisu ida atu servi ba povu no rai ida nee, tanba MSSI laiha inimigu no laiha aliadu maibe hanesan funsionariu publiku prinsipiu independente, tanba nee servisu labele tau interese pesoal maibe interese publiku.
“Ami nia kargu xefia MSSI husi nasional ba too iha munisipiu no postu administrativu hamutuk nain 156 pesoas xefia hotu, neebe ohin simu pose servisu ho responsabilidade ho fuan no laran atu servi povu,” hatete Ministra Solidaiedade Sosial no Inkluzaun ba jornalista sira iha Salaun MSSI Kaikoli, Tersa (10/3/2026).
Nia dehan, tomade de pose nee MSSI halo por anu, tanba haree ba avaliasaun, kuandu sira ladun iha responsabilidade halo servisu tenke muda, balun troka, balun hasai no balun iha mudansa, tanba kada tinan MSSI fo naran foun ba Komisaun Funsaun Publiku (KFP) atu bele reanunsia fila fali kargu xefia.
Tanba servisu iha MSSI laos fasil, maibe servisu ho pasiensia, presiza sakrifika, obedese, nasionalizmu ho patriotizmu, sente rai nee povu nian, se hanoin hanesan servisu lao diak.
Tanba nee imi tenke servisu ho espiritu fuan ho laran no sente ida nee hau nia maluk, familia ida nee halo, tanba keta halo kargu xefia aseitasaun neebe ohin asina imi juramentu ba Maromak, eroi, ba ema moris tokon 1.5 neebe moris.
Nia husu kargu xefia husi diretor ba too iha munisipal sira kuandu servisu labele haree ba partidu, ras no kor, maibe servisu nee ba ema hotu hanesan, servisu ho disiplina, komitmentu, komportamentu nomos indepedente, no servisu neebe laiha presaun husi nasional no husi se, maibe iha linha koordenasaun ho ministeriu sira seluk no respeitu lideransa sira xefi suku, xefi aldeia no joven sira hodi melhora atendimentu ba povu ba iha programa MSSI.
Iha fatin hanesan, Komisaria Komisaun Funsaun Publika, Anita Tavares Oliveira de Jesus hatete, asiste serimonia kompromisu husi funsionariu sira neebe hetan fiar atu asumi kargu diresaun Institutu ninian neebe MSSI kompleta ninia estrutura, hodi formaliza ofiasialmente liu husi serimonia tomade de pose.
Nia dehan, tomade de pose hanesan tradisaun ida ba administrasaun publika neebe reprezenta situs rua, ida inisiu veiklu legal, ida nee elementus instituisaun savi funsionariu idak-idak okupa kargu diresaun no xefia neebe mak responde ho direita guia no responsabilidade sira neebe lei hatur ba, rua aseitasaun husi pesoal idak-idak ba funsaun ofisial estadu nian, atu sai servidor povu ba estadu tuir lei no servi halao knaar interese estadu nian.
Iha serimonia tomade de pose nee Ministru Solidariedade Sosial no Inkluzaun (MSSI), Veronica das Dores akompanha husi Komisaria Komisaun Funsaun Publika, Anita Tavares Ribeiro de Jesus, Vise Ministra Ceu Brites, Prezidente INSS, Zeferino da Costa Bobo no Padre.
(joa)
