DILI, STLTIMORLESTE.com – Agrikultor kafe iha munisipiu sira hanesan Ainaro, Ermera, Likisa no seluk tan, husu ba Governu liu husi Ministeriu Agrikultura, Pekuaria, Peska no Floresta (MAPPF) atu halo intervensaun ba presu kafe neebe kontinua tun iha merkadu rai laran.
Preokupasaun nee mosu tanba folin kafe neebe tuir agrikultor sira tun liu, no la balansu ona ho folin nesesisdade baziku iha merkadu neebe sae beibeik.
“Tinan kotuk ba nee folin kafe ladun diak. Ami husu ba Governu atu bele kontrola folin kafe hodi nunee bele kobre fali ami nia kustu produsaun no mos sosa foos, mina, masin no seluk tan ba familia,” dehan Jose Andrade da Costa, Agrikultor ida husi Postu Administrativu, Ainaro, Munisipiu Ainaro, ba STL, Kuarta (11/03/2026).
Tuir Jose, maski folin kafe depende ba merkadu intrenasional, governu presiza intervein liuhusi subsidiu transporte ka buka mos komprador foun, neebe bele sosa ho folin neebe dignu liu ba sgrikultor sira.
Iha parte ketak, Observador Ekonomia, Padro de Oliveira hatete, dezafiu boot ba kafe Timor nian mak kualidade no mos kompetisaun husi nasaun seluk. Governu rasik seidauk fo komentariu ofisial kona-ba politika foun ruma atu fiksa folin kafe ba tinan ida nee.
(car)
