DILI, STLTIMORLESTE.com – Ministeriu Publiku iha alegasaun ba krime Kontra Bandu, solisita ba iha Tribunal Judisial Primeira Instansia Dili (TJPID) atu aplika pena suspensaun ba arguidu AGB.
Iha alegasaun Prokurador Domingos Gouveia deklara katak, arguidu konfesa ba faktus neebe iha katak, arguidu hatama sasan la tuir lisensa neebe iha.
Tanba nee Prokurador mantein ho akuzasaun neebe iha, atu halo prevensaun iha futuru, Prokurador solisita ba iha Tribunal Kolektivu, atu kondena arguidu pena prizaun tinan 3 suspende nia ezekusaun ba tinan 3.
Enkuantu parte defeza arguidu nian, Defensor Publiku solisita ba iha Tribunal Kolektivu, atu tetu deklarasaun sira hotu, tanba arguidu kolabora ho justisa konfesa ba faktus, atu aplika desizaun tuir konviksaun Tribunal nian.
Rona tiha alegasaun, Tribunal adia ba loron seluk hodi tama ba iha leitura akordaun.
Iha indisus sufisiente katak, iha loron 16/06/2025, mais ou menus haleu 12h:00, arguidu AGB ho veikulu marka Toyota Hi-lux derije ba Aldeia Puqulete, Sucu Gugleur, Postu Maubara, Munisipiu Liquisa, hodi hasoru Agosto Nunes ho objetivu atu arenda Agosto Nunes nia residensia ho montante US$ 250,00 por dia, hodi guarda objeitu neebe maka arguidu atu hatama ilegalmente.
Objeitu kontrabandu neebe maka arguidu atu hatama ilegalmente nomeadamente tabaku pohon sagu ho kuantidade 50 karton, ou seja, karton 1 iha 20 sakas, no sakas 1 iha masu ka falun 20.
Hafoin hetan konkordansia relasiona atu arenda uma refere.
Iha loron 18/06/2025, maizumenus 17h:00, arguidu kontinua ba buka Sabino Simão Barreto atu arenda veikulu neebe maka Sabino konduz, modelu camião ho marka Mitsubishi n.º matrikula 56-826-TL, ho montante USD, 150,00, ho objetivu atu ba tula objeitu kontrabandu refere.
Komu arguidu iha komunikasaun rutina ho individu ida konesidu ho naran Kaka husi Atambua Indonezia, neebe maka kombina malu hatama ilegalmente objeitu kontrabandu refere atraves via maritima, ho nunee iha loron 19 fulan Junu tinan 2025, maisumenus haleu 03h:00, arguidu ho Sabino konsege desloka husi Dili hodi ba iha Agosto Nunes nia residensia ho veikulu arendadu refere.
Kuandu too iha Agosto Nunes nia residensia, entertantu objeitu refere konsege guarda ona iha Agosto nia residensia, nunee arguidu konsege tula objeitu refere ba veikulu neebe maka nia arenda, tuir mai ekipa konjunta sira kompostu husi Diresaun Servisu Investigasaun Kriminal, Diresaun Servisu Informasaun Polisia no unidade husi F-FDTL, atraves sira nia tatika konsege identifika aktividade refere hodi halo atuasaun imediata ba arguidu.
Objeitu sira kontrabadu refere, arguidu hatama husi area fronteira marítima Tibalau, Maubara Liquisa, tarıba area refere, normalmente komunidade sira sempre halo aktividade kontrabandu.
Arguidu hatene katak relasiona ho bem merkadoria tabako, wainhira atu halo importasaun, obrigatoriu tenki iha lisensa husi entidade kompetente, maibe infelizmente arguidu ignora hodi kontinua importa sasan merkadoria refere ba fim komersiu sem iha autorizasaun no la liu husi kontrolu alfandega, hanesan aktu ida neebe fo benefisiu ba nia an no hamosu prejuizu ba Estadu.
Konsekuensia direita no nessesaria husi arguidu nia konduta refere, hamosu prejuizu ba estadu, maibe konkretamente la apuradu. Faktu sira deskrita arguidu atua ho forma livre, deliberada no propozitu konkretizada, no arguidu sira hatene katak, sira nia konduta refere proibidu no punidu tuir lei, maibe arguidu aseita no kontinua komete faktu.
Tanba nee, Konstitui arguidu nudar ko-autor material ba forma konsumadu ho krime Kontrabandu nebe maka previstu no punidu tuir artigu 316 husi Kodigu penal.
Prosesu nee, prezide husi Juiz Kolektivu, Ivan Patrocenio, Zulmira Auxiladora, Arjentino Nunes, MP reprezenta husi Prokurador Domingos Gouveia, arguidu sira hetan asistensia legal husi Defensor Publiku Estajiadu nain ida.
(ter)
