DILI, STLTIMORLESTE.com – Tribunal Judisial Primeira Instansia Dili (TJPID) realiza prosesu Sumariu hasoru arguidu ho inisial AX, neebe pratika krime hasoru lezadu inisial JSM hanesan membru F-FDTL.
Arguidu lori mai iha Tribunal, no Ministeriu Publiku (MP) akuza ho krime Ofensa Integridade Fisika Simples, neebe previstu iha artigu 145 husi Kodigu Penal.
Iha sala julgamentu laran, Juiz estajiadu deklara katak, krime neebe akuza ba iha arguidu nia natureza semi publiku, lei fo dalan atu dada fila, kuandu lezadu ba iha prosesu aseita.
Iha tentativa konsiliasaun nee, lezadu deklara katak perdua arguidu, maibe husu atu iha futuru arguidu labele halo tan hahalok nee.
“Hau perdua nia maibe hau husu atu iha futuru nia labele halo tan hahalok nee hasoru hau ka ba ema seluk, no ida nee ikus ona,” deklara lezadu iha sala julgamentu.
Iha sala julgamentu laran, arguidu mos deklara iha futuru sei la halo tan hahalok nee, arepende tebes ba hahalok nee.
Arguidu mos hamriik kaer lezadu nia liman hodi bensa no husu deskulpa ba lezadu.
Rona tiha arguidu no lezadu, Ministeriu Publiku no defeza husu Tribunal atu homologa prosesu nee.
Rona tiha MP no defeza, ikus mai Juiz estajiadu deside homologa prosesu no absolve arguidu husi instansia. Tribunal mos fo hanoin ba iha arguidu atu iha futuru labele pratika aktu hanesan nee ba lezadu ka ba ema seluk.
Tuir kronolojia katak, kazu nee akontese iha Tasi Tolu, loron 8 fulan Marsu tinan 2026, iha oras tuku 1 kalan. Momentu neeba arguidu lori fatuk tuda kona iha lezadu nia ibun.
No iha arguidu nain haat, maibe nain tolu minoridade tanba nee liberta tiha, arguidu AX mak lori mai iha Tribunal.
Prosesu nee prezide husi Juiz Estajiadu nain ida, Ministeriu Publiku reprezenta husi Prokurador Rafael Gusmao, arguidu hetan asistensia legal husi Defensor Publiku Henrique Mariz.
(ter)
