DILI, STLTIMORLESTE.com – Tribunal Judisial Primeira Instansia Dili (TJPID) kontinua halao julgamentu ba kazu deskonfia konsumu aimoruk formalin, hodi rezulta matebian Helena Ximenes lakon vida.
Prosesu refere antes nee Tribunal rona ona deklarasaun husi arguidu no sasin balu, tanba nee iha julgamentu kontinuasaun nee, Tribunal rona sasin Alfaredo Ximenes hanesan matebian Helena Ximenes nia kaben.
Sasin deklara katak, iha loron 3 fulan Setembru sasin akompanha mate isin Rosalina Cicilia hanesan sasin nia feton, husi Dili ba iha Baguia, no sasin nia feen Helena Ximenes iha hela Dili.
Sasin deklara, sasin ba tiha Baguia no simu telefone husi nia subrina sira neebe hela iha uma katak, sasin nia feen Helena Ximenes mate, tanba nee sasin husi Baguia mai iha Dili.
Sasin deklara, banhira sasin too iha uma, sasin nia subrina neebe hela iha uma informa ba sasin katak, matebian mate tanba hemu formalin.
Sasin deklara tan, formalin sosa iha neebe, sasin la iha konhesimentu, no sasin nia feen antes nee la iha moras ida, tanba sasin nia feton Rosalina Cicilia mate, sasin nia feen ajuda hela servisu dapur nian too aruma sasan hodi lori sai mate isin Rosalina Cicilia ba iha Baucau.
Aleinde nee sasin Ana Mariana Guterres deklara katak, momentu neeba sasin sira iha uma hamutuk ho matebian Helena Ximenes. Sasin deklara, matebian ba haris tiha, depois sai husi uma laran mai hateten ba sasin katak “hau labele ona, tanba nee sasin husu dehan tia nusa, no matebian hatudu ba be Agua mutin neebe rai hela iha sala vizita dehan, hau hemu buat neeba.
Sasin deklara, Agua nee rai mesak hela iha sala vizita klaran, laos rai iha meza neebe latan matebian Rosalina Cicilia ba, tanba meza nee hasai tiha ona mai liur.
Depois sasin mos hakbesik ba haree agua matan mamar hela, sasin loke agua matan no horon, suar kona sasin nia matan manas no iis forte los.
Sasin deklara, depois sira lori matebian Helena Ximenes ba iha HNGV, too iha neeba Doutor sira esplika ba sasin katak, matebian mate tanba hemu formalin. Tanba nee matebian mate deit iha sala emerjensia nian, la konsege halo autopsia, depois sasin sira deside lori fila mai iha uma.
Sasin deklara katak, matebian antes nee la moras ida, konaba formalin sosa iha neebe sasin la hatene, maibe agua neebe sasin foti nia lolon hakerek dehan formalin, no arguidu sira mos la esplika ba sasin sira kona-ba formalin nee sona ba iha matebian Rosalina Cicilia.
Rona tiha sasin, Tribunal adia ba loron seluk hodi kontinua julgamentu.
(ter)
