DILI, STLTIMORLESTE.com – Prezidente Republika (PR), Jose Ramos Horta defende rekonsiliasaun iha Painel Forum Global Baku nia iha Azerbaijaun.
Prezidente Republika, Jose Ramos Horta hamutuk ho fígura internasional proeminente sira iha painel nivel aas kona-ba Seguransa Global no Ekilibriu Poder nian iha Forum Global Baku XIII iha Azerbaijaun.
Fahe palku ho líder proeminente sira, inklui antigu Prezidente Konsellu Europeu Charles Michel no antigu Sekretariu-Jeral Liga Arabe Amre Moussa, Xefe Estadu kontribui ba diskusaun krusial sira kona-ba dezafiu seguransa neebe mosu daudaun.
Tuir komunikadu neebe STL asesu Sesta nee (13/03/2026) hatete, painel nee foka ba nesesidade urjente atu defende direitu internasional nuudar fundamentu esensial ba relasaun internasional neebe justu, estavel no duradouru iha mundu neebe sai instavel liutan.
Durante ninia intervensaun, Prezidente Ramos-Horta hatoo ho makaas bazeia ba Timor-Leste nia istoria rasik kona-ba konstrusaun pas, hodi hanoin hikas nasaun nia jornada neebe susesu husi konflitu too independensia no ninia rekonsiliasaun istorika ho Indonezia.
Xefe Estadu destaka katak lideransa polítika neebe vizionaria mak fundamental atu jere konsekuensia husi konflitu sira no tau baze neebe solidu ba dezenvolvimentu sustentavel.
“Ohin loron, Prezidente nota, Timor-Leste hamriik nuudar sasin moris ida kona-ba oinsa dialogu no kooperasaun internasional bele transforma panorama neebe naksobu husi funu ba nasaun neebe prosperu, neebe goza pas neebe forte, estabilidade institusional no lasu rejional neebe makaas,” dehan Prezidente Republika, Jose Ramos Horta.
Iha sorumutu nee Koalia konaba krize global atual sira, liu-liu konflitu devastador sira iha Mediu Oriente.
Prezidente fo avizu kona-ba impaktu umanitariu no jeopolítiku neebe grave. Prezidente Ramos Horta reitera katak nasaun kiik sira hanesan Timor.Leste depende makaas ba instituisaun multilateral sira no sistema internasional neebe bazeia ba regra no bazeia mos ba respeitu mutuu.
Sitadu husi ajensia notísias nasional AZERTAC, Prezidente Ramos Horta husik hela audiensia internasional ho mensajen neebe forte “Lideransa gia povu sira hodi lao ba seguransa, pas, rekonsiliasaun, no dezenvolvimentu.
Lisaun istorika nee importante ba nasaun hotu-hotu, inklui Azerbaijaun, hodi fo hanoin ba mundu katak dialogu no kooperasaun tenke nafatin sai prioridade absoluta atu atinje estabilidade global neebe duradouru.
(eme)
