BOBONARO, STLTIMORLESTE.com – Primeiru Ministru (PM), Kay Rala Xanana Gusmão bolu atensaun ba Diresaun Servisu Balkaun Uniku evita falsifikasaun dadus no dokumentus.
Balkaun Uniku hanesan inovasaun ida iha fornesimentu informasaun no servisu publiku ba sidadaun sira no mos setor privadu sira, neebe hanesan modelu servisu foun neebe oferese atensaun personalizada iha espasu fisiku ida neebe uniku iha nivel lokal, no promosaun ba kultura inovadora iha prestasaun servisu ba administrasaun publika.
Objetivu Balkaun Uniku atu reduz burokrasia no korupsaun, simplifika prosedimentus sira, aselera no moderniza prestasaun servisu publiku sira ho versaun dijital nuudar fonte konfiavel ida no seguru ba asesu informasaun kona-ba prosedimentus ba asesu servisus públikus, konstitui hanesan feramenta importante ida ba transparansia ativa husi valor servisu nee (6) kompostu efisiensia, kooperasaun, etika, asesibilidade, transparensia no inovasaun, atu lori prestasaun servisu publiku hakbesik liu ba povu, moderniza no simplifika servisu atendimentu publiku lais no fasil, inklui promove transparensia no boa governasaun husi atendimentu servisu sertifikadu rejistu kriminal, pasaporte komum, bilhete identidade no sertidaun nasimentu.
Iha ambitu vizita ofisial Primeiru Ministru Kay Rala Xanana Gusmão nian hamutuk ho komitiva iha Munisipiu Bobonaro haree besik servisu munisipal husi rezultadu avaliasaun ba kondisaun manima neebe realiza iha loron 12 Marsu nee, inklui inaugura edifisiu Balkaun Uniku iha Bobonaro.
“Parabens, uza ida nee uza ho diak, evita falsifikasaun dokumentus, ida nee iha laos imi hotu-hotu servisu, ema mai servisu nee servisu ho responsabilidade, integridade, lae ita kria buat oin-oin, susar,” hateten PM Xanana hafoin inaugura edifisiu Balkaun Uniku iha Bobonaro, Kinta (12/03/2026).
Primeiru Ministru apela ba diresaun servisu Balkaun Uniku atu evita falsifikasaun dadus no dokumentus, tanba iha Timor Leste akontese ona falsifikasaun dadus no dokumentus ba sidadaun NTT, Indonezia feto ida neebe hetan dokumentus legal sira hanesan pasaporte, bilhete identidade no seluk tan, aprezenta iha Tribunal kona-ba kazu rai neebe akontese iha tinan kotuk.
Nunee husu Balkaun Uniku atu servisu ho responsabilidade, integridade ba atendimentu publiku nian liu-liu iha trata dokumentus no atualiza dadus sira.
“Bolu atensaun ba imi hotu-hotu APA, PAM atensaun ba ida nee, keta haluha ho ida nee, ita hakbesik servisu sira nee ba halo buat oin-oin, sertidaun buat sira nee hotu faan rai arbiru, kuidadu ho ida nee, lae imi mak estraga rai,” Xanana apela.
(tom)
