DILI, STLTIMORLESTE.com – Atu instala Tribunal Judisial Primeira Instansia iha Baucau, Vikeke, Ermera no Maliana, oras nee daudaun iha ona faze preparasaun.
“Lansamentu primeira pedra ba Tribunal haat nee, agora faze preparasaun, tanba ami foin halo reuniaun inisial, atu kompanhia sira prepara sira nia prosedura planu no atividade nian, atu sira entrega dokumentus ita bele planu ba lansamentu primera pedra,” dehan Prezidente Tribunal Rekursu, Afonso Carmona ba jornalista sira iha Kaikoli, Tersa (17/03/2026).
Nia hatutan, iha fulan Abril buat hotu bele preparadu ona, hodi nunee bele hahu ona ho lansamentu primera pedra.
Sublina, kona-ba edifisiu provizoriu STJ oras nee daudaun halo ona reabilitasaun urjente, tanba tuir planu iha fulan Maiu nia laran tenke relata ona informasaun kona-ba instalasaun.
Akresenta tan, konaba Juiz sira neebe sei ba tuir iha STJ kabe ba iha ekipa komisaun rekrutamentu, maibe kona-ba orsamentu la too rihun atus ida, tanba apenas halo deit reabilitasaun no tuir planu sei halo foun iha Tribunal Rekursu nia sorin.
No garante sei finaliza tuir kontratu neebe iha, tanba kompanhia iha kapasidade hodi halo reabilitasaun.
Iha fatin ketak, Jurista Sergio Dias Quintas dehan, importante duni instala Tribunal haat atu lori justisa hakbesik ba komunidade sira.
“Importante duni estabelese Tribunal iha munisipiu sira, atu nunee komunidade sira neebe hela iha area remotas mos sente katak, justisa hakbesik ba sira,” dehan nia.
Hatutan tan, harii Tribunal iha Munisipiu sai mos hanesan dalan ida atu redus kazu pendente neebe iha.
Esplika tan, kona-ba STJ nesesariu hodi estabelese, tanba durante nee hirarkia Tribunais seidauk kumpletu signifika katak, durante nee servisu Tribunais seidauk maximu, tanba nee maka wainhira estadu iha politika hodi hari STJ nee hatudu katak, estadu iha seridade ba setor justisa.
Sublina tan, STJ hanesan orgaun soberania estadu nia iha poder judisial hodi tesi lia iha materia sivil no krime, bainhira sidadaun sira husu no orgaun soberania estadu seluk solisita.
Nunee, ita nia Majistradu no jurista lubuk ida mak iha ona kapasidade hodi ezerse nia funsaun nuudar Juiz iha STJ.
(ter)
