AMBENO, STLTIMORLESTE.com – Sidadaun feto ida ho naran Rozina Ote, idade 20 anos, hakotu ninia peregrinasaun moris liu husi dalan tara aan iha haris fatin iha Bairru Masin, Aldeia Sanane, Suku Costa, Postu Administrativu Pantemamasaar, Rejiaun Administrativa Espesial Oecuse-Ambeno (RAEOA).
Tuir Jacinto Nesi nuudar sasin neebe hela hamutuk ho nia iha uma nee konfesa ba jornalista sira iha ninia rezidensia Masin katak, alin feto nee mate iha haris fatin, sira mos la hatene. Dadersan, bain hira atu loke odamatan, derpenti odamatan haris fatin ladiak.
“Matebian nee mate iha haris fatin ami la hatene, tanba antes nee nia kondisaun diak hela, neebe dadersan atu kose nehan no soe bee boot iha haris fatin, derpenti deit odamatan save aan iha haris fatin, hau bolu husi liur mos lahatan, tanba nee hau bolu hau nia ferik oan tanba nia alin rasik,” dehan Jacinto Nesi ba jornalista sira iha ninia rezidensia Masin, Tersa (17/03/2026).
Nia haktuir tan katak, ho akontesementu nee, informa kedan ba autoridade Polisia Nasional Timor Lorosae (PNTL) too kedan fatin akontesimentu nee no halo kedan identifikasaun, nunee lori kedan ba Hospital Referal Oecusse (HRO) atu halo Autopsia.
“Kronolojia akontesimentu nee, dadersan hau hader mai kose hotu nehan, hau atu tama ba haris fatin hodi soe bee boot tanba hau nia kabun moras, tanba nee hau atu loke odamatan ladiak, hau mos atu hariis atu ba hanorin iha eskola, tanba hau bolu hela deit la iha ema atu loke odamatan, tanba nee hau bolu hau nia ferik ona mai atu ajuda hau loke odamatan, tanba nee kontinua ami bolu ema see iha haris fatin mos ema la hatan, hau tenta atu tebe rahun odamatan mos hau tauk tanba orsida hau nia ferik oan ninia maun sira siak fali ami, tanba nee maka ami bolu Polisia mak loke deit odamatan nee,” dehan Nesi haktuir kronolojia nee.
Nia dehan, akontesimentu nee iha dadersan, sira mos la hatene ida, despenti matebian tara aan iha haris fatin, durante nee hela hamutuk ho nia iha uma nee, diak hela la iha problema.
“Hau hela ho nia laiha problema, desde nia sei kiik, ami hela hamutuk ona iha uma nee, nunka iha problema, derpenti deit nia tara aan iha haris fatin,” haktuir nia.
Tuir observasaun katakmatebian uza hena mutin ida, maka tara aan iha haris fatin.
Matebian Rozina Ote, hakotu ninia peregrinasaun moris ho dalan tara aan, halo aman Martinho Ote ho inan Angelina Quefi, husi Postu Administrativu Nitibe moris hanesan agrikultor lakon sira nia oan feto.
Iha okaziaun nee ninia inan-aman matebian Rozita Ote, halo ona akordaun ho Polisia Investigasaun PNTL RAEOA, atu labele halo autopsia no dadaun prepra ona atu lori ona matebian ba ninia moris fatin iha Oamna Suku Usi Taku, Postu Administrativu Nitibe RAEOA hodi haloot tuirn kultura Oecusse nian.
Matebian moris iha loron 2 Dezembru 2004 no dadaun nia idade 22 anos ona, foin remta iha eskola tekniku Vokasional Palaban Oecusse tinan kotuk.
(jos)
