BAUKAU, STLTIMORLESTE.com – Deskonfia kompanhia lokal Marcalas Tradin Solotion Lda abandona projetu reabilitasaun edifisiu servisu delegasaun Sekretaria Estadu Kooperativa (SEKoop) iha Munisipiu Baukau.
Koordenador SEKoop Baukau, Domingos de Graça da Silva Ximenes esplika, hafoin dezisaun husi Autoridade Munisipiu Baukau hasai servisu delegasaun territorial hanesan SEKoop husi edifisiu Administrasaun Munisipal Baukau, mak iha tinan 2025 SEKoop kontratu kompanhia Marcalas Tradin Solotion Lda halo reabilitasaun ba eis edifisiu Alola iha area Watulete, Suku Tirilolo, Postu Administrativu Baukau Vila ho valor orsamentu rihun US$ 14 resin ba durasaun servisu fulan 3 iha tinan 2025, maibe too ona fulan Marsu tinan 2026 projetu reabilitasaun refere seidauk finaliza, tanba deskonfia kompanhia abandona servisu.
“Faze reabilitasaun nee lao iha 2025 maibe seidauk finaliza, tan nee agora daudaun SECoop Nasional fo ultimatu ba kompanhia refere tanba la tuir akordu neebe mak selebra iha Nasional,” Koordenador SECoop Baukau, Domingos de Graça da Silva Ximenes informa ba STL iha nia knaar fatin Tirilolo Baukau, Kuarta (18/03/2026).
Nia sublina, SEKoop sei foti medida hasoru kompanhia refere, tanba la finaliza projetu tuir kontratu neebe selebra, maibe SEKoop mos rekonhese seidauk halo pagamentu ba kompanhia refere, tanba nee sei bolu hikas kompanhia refere hodi finaliza projetu, maibe bainhira kompanhia refere lakohi hafoin SEKoop kontratu fali kompanhia seluk hodi finaliza.
Tanba SECoop delegasaun territorial Baukau daudaun prezisa tebes edifisiu, nunee husu urujentemente finaliza lalais obra refere.
“SEKoop prezisa loos edifisiu refere, tanba agora daudaun aluga deit uma tinan 2 ona, kada fulan tuir kontratu neebe iha US$ 500,” Domingos akresenta.
Too notisia nee publika STL seidauk hetan komfirmasaun husi kompanhia Marcalas Tradin Solotion Lda, tanba rezidensia iha Dili no observasaun STL nian iha terrenu nota katak, implementasaun projetu refere laiha kuadru projetu.
Entretantu total funsionariu neebe daudaun halao servisu iha SEKoop delegasaun territorial Baukau hamutuk nain 15 kompostu ajente no kazuais.
(tom)
