DILI, STLTIMORLESTE.com – Provedor Direitus Humanus no Justisa (PDHJ) realiza dialogu hamutuk ho sosiedade sivil sira, kona-ba prevensaun tortura no ratifikasaun protokolu fakultativu ba konvensaun kontra tortura, hodi sujere ba Paralmentu Nasional (PN) atu ratifika protokolu nee.
Tuir Provedor, Virgilio da Silva Guterres katak, koalia kona-ba eventu nee atu fasilita konferensa ida nee, dialogu ho parseiru sira kona-ba prosesu ratifikasaun protokolu.
“Ita Timor Leste ratifika tiha ona konvensaun Nasoins Unidas nian kontra tortura iha tinan 2005, elementu importante nee mak ita seidauk ratifika, ita kompromete iha tinan 2005 atu asina mak protokolu fakultativu kontra trotura nian,” dehan Provedor iha Timor Plaza, Kuarta (18/03/2026).
Nia hatutan, hamutuk ho organizasaun sosiedade sivil AJAR, fasilita husi organizasaun Internasional ida neebe funda iha Swisa, neebe halo advokasia kona-ba ida nee. Sira mai atu fahe hanoin ho organizasaun sosiedade sivil, PN, Governu no Ministeriu relevante sira, no parseiru Polisia Nasional Timor Leste konvida hela sira, maibe sira la marka prezensa, agradese ba iha F-FDTL sira neebe marka prezensa.
Esplika, sei rona hanoin husi Unidade Direitus Umanus nian no sosiedade sivil atu enkoraja PN hodi ratifika opsaun nee.
Reforsa, semana balu liu ba Provedor haruka ona rekomendasaun ba iha PN, rekomenda atu PN diskute hodi ratifika protokolu fakultatif nee. No aprezenta ba iha PN mak nota konseitu no rekomendasaun hodi fo razaun, tanba saida maka Timor Leste presiza atu ratifika konvensaun ida nee.
Virgilio dehan, faktus kona-ba tortura iha, maibe seidauk indentifika, ida nee tortura mak halo ka lalos.
Durante nee PDHJ halao funsaun vizita sela detensaun, vizita mos iha prizaun no haree katak, kondisaun sela detensaun barak la serve atu detein ema. Sela detensaun neebe diak maka hanesan iha Munisipiu Lautem nian, sira seluk seidauk diak, maske rekomenda ona maibe balu seidauk hadia.
Iha fatin hanesan, Vice Prezidente Komisaun A, Asuntu lei no konstituisaun, Antonio Verdial dehan PN hein dokumentus husi PDHJ, atu hare konaba ratifikasaun nee.
“Parlamentu sempre iha no akompana atu buat hotu lao diak, tanba nee PN hein binhira maka sira submete dokumentus neebe iha,” dehan nia.
Hatutan, PN hanesan reprezentante povu, tanba nee dokumentus neebe maka sei haruka husi PDHJ ba iha PN, sei hare didiak atu tempu badak bele ratifika dokumentus refere.
(ter)
