DILI, STLTIMORLESTE.com – Numeru husi Defensor Publiku seidauk sufisiente, tanba nee iha futuru presiza aumenta tan numeru Defensor Publiku.
“Rekursu umanus falta, atividade iha Tribunal intensiva ita tenke asegura ida nee, uluk Defensor nain 15, agora nain 10,” dehan Defensor Publiku Jeral, Cansio Xavier ba jornalista sira iha Kaikoli, Kuarta (18/03/2026).
Nia hatutan, importante mos asegura prosesu sira iha Tribunal no mos delijensia sira iha KAK, PSIK, iha estasaun Polisia sira kontinua asegura.
Esplika tan, konaba vizita iha prizaun halo ona programa ida haruka Ofisial Justisa husi Defensor Publiku nian ba iha Prizaun, no rekolha informasaun atu kliente sira neebe hakarak koalia ho sira nia Defensor bele buka espasu tempu hodi ba koalia ho sira nia kliente.
Afirma, Defensor sira laos loron-loron tenke ba koalia deit ho kliente sira, maibe sira mos presiza formasaun, tanba rekezitus atu hetan liberdade kondisional sira tenke tuir formasaun direitus umanus, no formasaun sira seluk atu bele sai abilidade ida neebe diak.
Reforsa, rekursu iha Defensoria Publiku nain 10, hatudu katak sei iha dezafiu nafatin, tanba nee presiza aumenta tan rekursu umanus iha area Defensor Publiku nian. Maibe maske numeru la sufisiente, kontinua nafatin halao servisu neebe iha, hodi responde ba publiku nia prekupasaun.
Iha sorin seluk, Akademiku UNTL, Sebastiao dos Santos dehan, presija aumenta numeru Defensor Publiku atu asegura prosesu sira neebe rejista iha Defensor Públiku.
“Hau hanoin presiza duni iha rekursu umanus neebe sufisiente, atu nunee apoiu servisu Defensor nian atu bele lao ba oin,” dehan nia.
Informa tan, ohin loron prosesu barak mak rejista, tanba nee importante duni iha rekursu umanus atu elabora prosesu sira nee hodi redus kazu pendente sira.
(ter)
