DILI, STLTIMORLESTE.com – Prezidente Republika (PR), Jose Ramos Horta halo enkontru ho Embaixador Não Residente Emiradus Arabes Unidus (EAU) ba Timor Leste, Abdulla Salem AlDhaheri, no Konselheira husi Embaixada EAU iha Timor Leste, Shaima Salem, hodi diskute estabilidade rejional no projetu dezenvolvimentu foun.
Iha loron kuarta (18/03/2026) Prezidente Republika, J. Ramos-Horta halao sorumutu produtivu ida ho Embaixador Não Residente Emiradus Arabes Unidus (EAU) ba Timor-Leste, Abdulla Salem AlDhaheri, no Konselleira husi Embaixada EAU iha Timor-Leste, Shaima Salem, iha Palasiu Prezidensial Nicolau Lobato.
Iha biban nee Embaixador Não Residente Emiradus Arabes Unidus (EAU) ba Timor-Leste, Abdulla Salem AlDhaheri, no Konselleira husi Embaixada EAU iha Timor-Leste, Shaima Salem, ba jornalista iha palasiu Kuarta 18/03/2026 hatete Diskusun sira foka liu ba preokupasaun urjente kona-ba seguransa rejional iha Mediu Oriente nomos dezenvolvimentu foun sira.
“Sente haksolok hasoru malu ho Prezidente Republika Jose Ramos Horta ohin hasoru malu nee deskute konaba funu iha mediu oriente nomos koalia assuntu dezenvolvimentu sira neebe EAU sei apoiu halo iha Timor Leste,” katak nia.
Prezidente espresa ninia solidariedade ba Emiradus Arabes Unidus no nasaun afetadu seluk. Xefe Estadu reafirma Timor-Leste nia kompromisu ba pas no hatudu ninia intensaun atu uza ninia pozisaun internasional no ligasaun ho ninia maluk laureadu Nobel sira atu advoga ba de-eskalada no lori hikas estabilidade ba rejiaun nee.
Destaque importante husi vizita diplomatika nee mak avansu husi doasaun signifikativa neebe finansia husi EAU atu harii fasilidade akomodasaun ho kualidade modernu ba estudante feto sira. Lokaliza iha besik Palasiu Prezidensial, projetu nee sei fornese kuartu 500 ho kualidade aas no tuir planu atu ramata iha fulan-maiu 2027. Diretor tekniku sira dadaun nee iha baze hodi avalia, atu garante katak projetu nee lao tuir planu hodi apoia nesesidade edukasional juventude timoroan sira.
Ba oin parte rua esplora atu habelar kooperasaun bilateral iha setor ekonomia, turizmu no saude. Delegasaun espesializada ida husi EAU sei halo vizita mai Timor-Leste iha fulan-bbril atu define diak liutan parseria sira-nee no identifika oportunidade foun ba investimentu.
EAU espresa sira-nia apresiasaun ba relasaun diak entre nasaun rua nee, hodi destaka kompromisu konjuntu atu hametin liutan parseria nee iha futuru.
(eme)
