DILI, STLTIMORLESTE.com – Prezidente Republika (PR), Jose Ramos Horta fo pose ba Eliza Maria da Silva hodi asumi kargu nuudar Embaixadora Timor Leste ba ASEAN.
Bainhira remata simu tomada de pose, Ministru Negosiu Estranjeiru no Kooperasaun (MNEK), Bendito Freitas ba jornalista sira iha Palasiu Prezidensia Nicolau Lobato, Bairo Pite, Kinta (19/03/2026) hatete, ohin 19 Marsu iha Palasiu Prezidensial, Prezidente Republika fo tomada de pose ba embaixadora foun nomos reprezentante permanente ba Asosiasaun Nasoins Sudeste Aziatiku iha ASEAN, iha Jakarta, nee mak Embaixadora Eliza Maria da Silva neebe ohin simu pose husi Prezidente Republika ho misaun ida klaru atu ba substitui Embaixadora Natercia Coelho neebe mandatu remata fila ona mai Timor Leste.
“Neebe ita haree katak imperativas nesesidade ligadu ba ita nia adezaun planea ona ba ASEAN, rekezitu ba integrasaun rejional ho ezijensia hotu-hotu neebe papel iha Sekretariu ASEAN, liu-liu ba ita nia reprezentante permanente Timor Leste nia iha ASEAN iha Jakarta nia papel importante tebes nee mak ohin tomada de pose ona ita nia belun Embaixadora Eliza atu haktuir ona nia knaar nia funsaun nuudar embaixadora postu iha Jakarta liu-liu iha ASEAN,” Katak Ministru MNEK.
Ministru hatete, ba oin servisu makaas, tanba nee embaixadora tenke halo koordenasaun ho nivel hotu-hotu, liu-liu kona-ba kooperasaun ho estadu membru sira hotu, liu liu kooperasaun teknika interministerial neebe lidera husi Visi Ministra Asuntu ASEAN no ekipa tomak servisu makaas atu bele konkretiza mehi boot sai hanesan Prezidensia neebe tuir planu espetativa akontese iha 2029.
Ministru hatete, kualker diplomata embaixador no embauxadora neebe mak hetan tomada de pose husi Prezidensia klaru ke iha mandatu ba sira atu kumpre no ejerse ho obidiensia no lealdade ba sira nia misaun tanba reprezenta estadu I reprezenta mos Xefe Estadu iha rai liur.
Embaixadora nee mos laos foun kareira diplomatika ho esperensia professional iha area diplomasia liu liu iha area ASEAN neebe durante nee apoiu makaas ba preparasaun tekniku too TL nia adezaun formal, agora tama ba integrasaun rejional ho rekejitu hotu hotu no presizamente ida nee tanba nee rekomenda husi konsellu Ministru no Primeiru Ministru rasik mos rekomenda katak nia iha kbiit iha kompetensia abilidade teknika professional diplomatika atu bele ezerse nia funsaun nuudar reprezentante permanente iha ASEAN iha Jakarta.
Nunee mos Embaixadora Timor Leste Ba ASEAN, Eliza Maria Da Silva hatoo agradese ba Prezidente Republika Jose Ramos Horta nomos Primeiru Ministru Kay Rala Xanana Gusmao nomos Ministru MNEK neebe mak fo komfiansa ba nia hodi assume kargu nuudar embaixadora TL ba ASEAN hodi troka Embaixadora Natercia Coelho neebe remata ona nia misaun.
“Buat saida mak halo halo klaru kontinua saida mak senhora embaixadora halo tiha ona, hanesan Ministru dehan ita sai ona membru Plenu ita sei kontinua halao ita nia knaar implementasaun roteru neebe mak sei kontinua, halo mos kordenasaun entre misaun ho ajensia sekretariadu nomos ho kapital, ida nee mak serbisu neebe hau kontinua halo klaru hau mos sei kontinua kordena nafatin ho kapital atu nunee bele implementa roteiru ba komprimisiu neebe mak ita halo ona ba ASEAN,” Katak Embaixadora.
Iha biban nee Embaixadora mos hatoo agradese ba Visi Ministra ASEAN neebe mak sira serbisu hamutuk sai mos nuudar sira nia supervisor ba assuntu ASEAN nia, no agradese tanba fo mos oportunidade no fo fiar ba nia.
(eme)
