DILI, STLTIMORLESTE.com – Embaixada Portugal ho ninia delegasaun mai vizita Ministeriu Defeza halao enkontru kortezia, koalia kona-ba kooperasaun entre Timor Leste ho Portugal.
“Embaixador Portugal Duarte Bue Alves ho ninia adidu mai vizita Ministeriu Defeza depois nia foin simu knaar hanesan Embaixador Portugal, depois foin mak mai Timor Leste, ohin mak oportinidade mai vizita Ministeriu Defeza,” hatete Ministru Defeza Kontra Almirante, Donaciano dos Rosario da Costa “Pedro Klamae Fuik” ba jornalista sira iha Ministeriu Defeza Fatuhada Dili, Kinta (19/03/2026).
Nia dehan, Embaixador Portugal mai hanoin balun para diskuti haree oinsa mak atu intesifika kooperasaun entrega Timor Leste ho Portugal neebe mak ho istoria naruk dezde tempu antigu too fali agora, nomos prosesu konstrusaun estadu nasaun iha tinan 24 nee nia laran.
“Portugal nia kooperasaun ho ita, liu-liu iha ambitu defeza, iha ona programa kuadru ida neebe mak perepara ona, neebe ita hein katak sei bele asina iha tempu badak, tanba programa kuadru nee defini kooperasaun entre Portugal ho Timor Leste iha ambitu defeza,” nia esplika.
Nia informa, sira koalia mos Timor Leste retein prezedensia CPLP tinan ida nee, atu haree liu oinsa mak organiza enkontru Ministru Defeza kona-ba CPLP nian atu halao iha Timor.Leste ou Portugal depende ba situasaun neebe mak liu iha mundu.
“Hanesan ita hotu hatene katak, ita haree no rona situasaun politika iha mundu nee ladun diak, neebe situasaun hira nee maka determina sirkontansia hotu-hotu atu ita bele diside organiza enkontru sira nee, iha nee ga iha Lisboa no hau hamutuk ho Embaixador Portugal konkorda para halo tan servisu sira seluk neebe mai hanesan ona servisu neebe mak Embaixada Portugal dezenvolve husi Ministeriu Defeza dezenvolve, ami iha partipasaun hamutuk hodi apoiu malu hanesan tuir programa neebe mak estabelese,” nia deklara.
Iha fatin hanesan, Embaixador Portugal Duarte Bue Alves agradese no obrigadu barak tanba bele simu ona sira nia vizita importante ida nee, iha vizita nee Embaixada Portugal hakarak kria kooperasaun bilateral neebe diak liu tan ba futuru hodi halao programa sira neebe iha ona.
(jen)
