DILI, STLTIMORLESTE.com – Institutu Nasionál Kombate HIV/SIDA, (INCSIDA) sensibiliza informasaun kona-ba virus HIV ba estudante Eskola Nobel da Paz atu halo prevensaun ba moras HIV-AIDS, tanba moras nee perigozu ba vida nomos estraga futuru.
“Atividade ohin mai iha Eskola Nobel da Paz nee, ita haree ba ita nia situasaun moras HIV-AIDS iha Timor Leste neebe perigozu ba ema hotu nia vida, tanba sa kazu transmisaun husi raan nee ituan deit, kuaze laiha, maibe ida agora barak nee transmisaun husi feto ida mane ida,” hatete Prezidente Institutu Nasionál Kombate HIV/SIDA (INCSIDA), Daniel Marçal ba jornalista sira iha Eskola Nobel da Paz Dili, Tersa (24/03/2026).
Nia dehan, seksu livre neebe akontese barak tanba saida, fatin desponivel sira mos agora barak tebe-tebes, liu-liu iha Munisipiu Dili nee halao relasaun seksual barak no hetan ona moras HIV.
“Foin daudaun ami koalia ona ba autoridade sira preokupa tebe-tebes, tanba tinan ida nee ita nia esforsu makaas mak nafatin koalia para hasae ema nia konsiensia hodi hatene katak seksu livre nee la diak, ba feto klosan ba mane klosan sira, nomos ba sira neebe forma ona uma kain, iha ona feen no laen, maibe seksual nee ema hotu nia direitu, maibe kuandu livre nee bele prejudika ita nia direitu no futuru,” nia deklara.
Nia informa, INCSIDA mai iha nee hodi sensibiliza informasaun kona-ba virus HIV, atu motiva estudante sira no joven sira, tanba hotu-hotu domin ba rai ida nee, hadomi joven sira atu saude diak hodi dezenvolvementu ba futuru oin mai.
“Tanba nee ita husu ba inan aman, husu mos ba igreja koalia nafatin kona-ba moral no hasae ema nia konsensia atu hadook aan husi relasaun seksual livre,” nia hatutan.
Iha fatin hanesan, Diretor Eskola Sekundariu Nobel da Paz, Jeremias P. de Jesus informa, atividade ohin neebe INCSIDA halao iha Eskola Nobel da Paz nee importante, tanba fahe informasaun kona-ba HIV-AIDS ba estudante sira atu bele halo prevensaun ba moras nee rasik, tanba moras nee persiza iha konhesimentu neebe klean atu halo prevensaun.
“Hau agradese tebes ba Prezidente INCSIDA neebe fahe informasaun diak ba ita nia jerasaun, tanba jerasaun sira mak aban bairua troka ita, ita nee katuas no ferik hotu ona, entaun jerasaun tenke livre husi moras HIV, tanba informasaun nee importante tebes,” nia deklara.
Nunee mos Estudante Eskola Nobel da Paz, Celina Seran Soares esplika, INCSIDA nia atividade ida nee importante tebe-tebes ba estudante, tanba laiha informasaun bele ransu livre no seksu livre no lakon esperasaun no futuru.
“Tuir hau nia hatene, moras HIV-AIDS nee barak liu detekta husi relasaun seksual neebe livre, tanba nee informasaun kona-ba moras HIV nee importante tebes ba ami estudante sira para halo prevensaun ba moras nee, tanba futuru importante,” nia afirma.
(jen)
