DILI, STLTIMORLESTE.com – Prosesu Servisu Rejistu no Verifikasaun Emprezarial (SERVE) iha rua mak tama iha Komisaun Anti Korupsaun (KAK) no ida finaliza ona, ida sei iha prosesu investigasaun nia laran.
Tuir Komisariu KAK, Rui Pereira katak, kona-ba SERVE nian iha prosesu rua, ida neebe tama primeiru investigasaun konklui no haruka ona ba iha Ministeriu Publiku (MP) no ida neebe foun prosesu investigasaun sei lao hela.
“Parlamentu Nasional mos levanta kona-ba, ita nia Prezidente SERVE IP nian, neebe karta nee mai hotu ona iha nee, ida uluk KAK halo buska aprensaun nia prosesu termina tiha ona no haruka ona ba Ministeriu Publiku (MP) no ida nee prosesu foun neebe Parlamentu levante nee, karta mai ona iha nee ita hein hatoo resposta ba, kazu nee iha hela prosesu investigasaun nia laran,” dehan Komisariu ba jornalista sira iha Farol, Tersa (24/03/2026).
Nia hatutan, iha Parlamentu Nasional levanta dehan deskonfia abuzu poder, Komisariu ho ekipa sei prepara hela resposta ba iha Parlamentu Nasional.
Sublina tan, iha prosesu rua nee ida KAK finaliza ona nia investigasaun no haruka ona ba iha MP, no ida foun nee sei iha prosesu investigasaun nia laran.
Reforsa, levanta iha Parlamentu Nasional dehan Prezidente SERVE IP, tanba nee KAK mos rejista tuir saida mak levanta iha Parlamentu Nasional. Tanba nee prosesu lao hela iha Diresaun Investigasaun rekolha dokumentus no rona ona sasin sira.
Iha fatin ketak, Akademiku UNTL, Rafael de Jesus dehan, KAK tenke halo investigasaun ho klean, ba prosesu sira nee.
“Hau hanoin KAK presiza halo investigasaun ba prosesu sira hanesan nee, hodi hatene lo-loos akontese duni ka lae,” dehan nia.
Nia hatutan, KAK hanesan ekipa neebe hamriik hodi kombate korupsaun, tanba nee sujere atu konklui lalais investigasaun neebe sei lao hela.
Tuir informasaun neebe iha, antes nee iha tinan 2025 KAK halo buska ba iha SERVE, ligasaun ho informasaun neebe espalha kona-ba deskonfia, kobransa ilegal no mos deskonfia pratika sistema familiarizmu iha rekrutamentu ba servisu balu.
(ter)
