DILI, STLTIMORLESTE.com – Eis Prezidente Republika Indonezia (RI) Ibu Megawati Soekarnoputri sei vizita Timor Leste (TL) iha fulan 20 Maiu tinan 2026.
Lia hirak nee hatoo husi Prezidente Republika Jose Ramos Horta ba jornalista sira iha Aeroportu Internasional Nicolau Lobato, Bairo Pite, Tersa (24/03/2026) hatete, viajen badak ba Jakarta prinsipal mak hasoru malu ho eis Prezidente RI Megawati Soekarnoputri, tanba hasoru malu semana hirak liu ba iha Dubai Abu Dhabi koalia klean kona-ba relasaun Timor Leste ho Indonezia.
“Tanba nia uluk mai ita nia restaurasaun indepedensia, nia mak hahu duni hametin relasaun ho Timor Leste prosesu rekonsiliasaun, konsolidasaun estabilidade ho Indonezia rasik demokrasia iha neeba, nia simu husi Habibie husi Gusdur iha tinan sira nee nia laran sempre kontaktu ho nia entaun hanoin tinan 25 liu tiha ona nia mai kontente los, entau sei konfirma nia mai 20 Maiu, hanesan ita boot sira hatene Ibu Megawati Soekarnoputri nia Prezidente PDI neebe partidu boot liu iha indonezia iha Parlamentu Nasional Indonezia nia, nia oan feto mak Prezidente Parlamantu Nasional Indonezia nia,” dehan PR Horta.
Prezidente Republika hatete, razaun prinsipal nia viajen ba Jakarta mak ba hasoru malu ho eis Prezidente Republika Megawati, aleinde nee prezidente viajen ba Jakarta haree mos parte nasional ida neebe inisiativa privadu.
“Hanesan ita nia iha parte Nino Koni Santana maibe boot liu, haree didiak se bele iha esforsu Governu aumenta hadia liu tan parte nasional iha Timor Leste, tanba ita iha deit mak Nino Koni Santana fo esperiensia modelu ida diak tebes, neeba nee Governu la tau osan,” katak PR Horta.
Xefe Estadu hatete, Timor Leste mos bele halo tuir fatin turizmu hanesan Indonezia nia nee, no Prezidente rasik iha ona idea ida formalizadu ona atu halo iha Timor Leste.
Iha neeba 100% investimentu senhor Tomi Winata nia Governu Indonezia la tau osan, tanba nee mak Prezidente ba vizita Turizmu Indonezia loron ida deit fila kedas.
Aleinde nee iha informasaun katak Prezidente Republika hasoru malu ho Eis Prezidente Republika Indonezia Ibu Megawati husu ruin Saudozu Nicolau Lobato nee los ka lae? Hatan ba kestaun nee Prezidente Republika hatete, sira hasoru malu la koalia ba ida nee, no ida nee mos laos Ibu Megawati nia responsabilidade.
“Ami hasoru malu la koalia ba ida nee, no ida nee mos laos nia responsabilidade direitu, maibe asuntu nee sempre koalia ho autoridade sira iha neeba para haree didiak kontinua hein bainhira mak Prezidente Prabowo Subianto bele mai Timor Leste, hakarak mai hakerek dala rua tiha ona hakarak mai maibe too agora seidauk iha data maibe tinan ida nee nia sei mai duni nia hatete,” katak PR Horta.
Durante vizita ba Jakarta, Prezidente Ramos Horta hatoo profunda gratidaun ba lideransa istorika husi Eis-Prezidente Ibu Megawati iha normalizasaun relasaun diplomatika entre Timor Leste no Indonezia.
Prezidente espesifikamente hanoin hikas ninia prezensa iha serimonia independensia Timor Leste nian iha loron 20 Maiu tinan 2002, iha Dili momentu neebe konsidera amplamente nuudar pasu importante iha prosesu rekonsiliasaun entre nasaun rua nee.
Prezidente nota katak Ibu Megawati ninia prezensa, hamutuk ho líder global sira seluk, hatudu sinal forte ida kona-ba kompromisu Indonezia nian ba kapítulu foun kona-ba amizade no kooperasaun.
Prezidente Ramos Horta sublina katak Ibu Megawati Soekarnoputri tenke hetan rekunesimentu ba konsolidasaun independensia no estabilidade Timor Leste nian, no mos ba kontinuasaun no susesu movimentu reformista Indonezia nian no konsolidasaun demokrasia iha Indoneziaesforsu sira neebe inisia hosi Prezidente B. J. Habibie.
(eme)
