DILI, STLTIMORLESTE.com – Relasiona ho lei kodigu sivil neebe sai preokupasaun publiku, Ministru Justisa deklara kona-ba lei kodigu sivil neebe mak hetan ona aprovasaun iha reuniaun Konselhu Ministru (KM), daudaun iha prosesu nia laran no nia konteudu nee todan tebes.
“Lei kodigu sivil nee hetan ona aprovasaun husi Konselhu Ministru, neste momentu atu halo kontrolu sira nee, hau ho Ministru PCM iha kompetensia tama ona ba Ministru Prezidensia Konselhu Ministru atu lori esbosu nee ba iha Konselhu Ministru. Nunee hakarak hateten katak prosesu nee lao hela, hau la lembra nia artigu hira mais kodigu rejistu sivil ida neebe nia konteudu nee todan, maibe nia fo solusaun ba problema sira neebe liu-liu ita nia sosiedade nia,” dehan Ministru Justisa, Sergio Hornai ba jornalista sira iha Kaikoli, Tersa (24/03/2026).
Nia hatutan, lei kodigu sivil importante tebes, tanba nee governu aprova ona kodigu refere, nunee iha tempu badak iha Gabinete liu husi Diresaun Nasionàl asesoria lejislasaun Ministeriu Justisa nia atu halo koordenasaun ho Prezidente Konselhu Ministru atu haree kona-ba nia konteudu ba iha Parlamentu Nasional.
Esplika tan, atu iha ajenda plenariu ou ba iha Komisaun para Komisaun halo diskusaun no ba iha espesialidade atu hetan aprovasaun, hanesan ita boot sira akompana ba iha proposta lei sira neebe sempre lao.
Akresenta, Governu la halo revizaun ba lei hotu kedas maibe haree liu ba lei ida neebe sai preokupasaun netral ba ema hotu nia, atu oinsa mak halo rekonhesimentu ba iha direitu intelektuais.
Informa, la halo revizaun hotu kedas, maibe haree ba ida neebe mak sai preokupasaun sentral ita nia liu-liu ba iha kazamentu, rejistu ba minoridade rejistu kazamentu hirak nee hotu sei haree, oinsa mak halo rekonhesimentu ba iha direitu intelektuais, direitu kompateten no direitu sira seluk neebe ita haree katak, iha lei ambrela Kodigu sivil nee seidauk regula entaun ita presiza regulariza lei Kodigu rejistu sivil nia.
Iha fatin seluk, Provedor Direitu Umanu no Justisa (PDHJ), Virgilio da Silva Guterres informa, kona-ba lei kodigu sivil nee, sidadaun sira preokupa tanba reklamasaun barak hosi joven sira neebe mak rezultadu kazamentu mistu.
“Lei kodigu sivil la fo balansu, tanba la fo rekonhesimentu, nunee ami hatoo pedidu fiskalizasaun atu deklara inkonstitusional, tanba ema musulmanu sira nee atu halo sertidaun batizmu iha neebe,” Provedor deklara.
Nia hatutan, pedidu fiskalizasaun ba lei Kodigu sivil nee ba iha Tribunal Rekursu, maibe Tribunal deklara katak lei Kodigu sivil nee rasik la viola konstituisaun.
Informa, pedidu fiskalizasaun sai tiha ona katak lei nee rasik la viola konstituisaun. Dekretu lei tuir sira nia haree viola konstituisaun, tanba ita nia estadu nee separasaun entre estadu no relijiaun, ita nia konstituisaun koalia kona-ba ida nee. Tuir lolos nee ita labele uza fali rekejitus relijiaun ba sidadaun sira hotu, tenke halo ba ema ida nian, tanba lei nee rasik la fo rekonhesimentu.
(ter)
