DILI, STLTIMORLESTE.com – Prezidente Republika (PR), Jose Ramos Horta hatete, la tolera halo diskriminasaun hasoru feto iha instituisaun PNTL, F-FDTL nomos instituisaun estadu no privadu sira, tanba feto sira mos matenek no kapasidade neebe diak.
Prezidente Republika Jose Ramos Horta hatoo kestaun nee ba jornalista sira, bainhira remata vizita ba Jakarta no fila hikas mai Timor Leste iha Aeroportu Internasional Nicolau Lobato, Komoro, Tersa (24/03/2026).
Xefe Estadu hatete, labele iha toleransia liu halo diskriminasaun hasoru feto iha PNTL ka iha F-FDTL ka iha instituisaun estadu nia.
“Feto sira lubuk ida iha formasaun boot, feto sira hatudu dedikasaun ba fatin neebe sira servisu, iha parlamentu ita haree feto sira mak matenek liu balun hakilar demais maibe kuandu lee buat neebe sira hakerek nee maske sira hakilar makaas sira la hakilar arbiru dokumentus neebe sira lee nee lakon tempu estuda, iha Governu mos feto sira hatudu servisu diak,” dehan Prezidente Republika Jose Ramos Horta.
Xefe Estadu hatete, tuir nia haree ohin loron feto barak iha kapasidade neebe diak no iha Governu mos feto sira hatudu sira nia servisu diak, nomos iha Parlamentu Nasional feto sira kritika ho matenek ho dadus, laos hakilar arbiru.
“Iha Universidade iha fakuldade sira neebe difisil hanesan medisina feto mak barak liu, mane sira ba buka kursu sira neebe fasil hanesan sospol feto sira ba hili fakuldade neebe difisil hanesan matematika, medisina, nee realidade ita haree deit husi UNTL, medisina barak liu feto tanba difisil liu,” katak PR Horta.
Xefe Estadu hatete, tuir nia haree feto barak mak hatudu ona iha sira nia servisu, feto bele lidera no feto mos bele foti desizaun no bele halo atividade hanesan mos mane iha instituisaun estadu no privadu sira.
Prezidente Republika koalia kona-ba promove feto laos koalia deit, maibe hatudu husi pratika iha Palasiu Prezidensial feto mak lidera kargu sira importante hanesan Xefe Kaza Sivil lidera husi Feto nomos adjunta Xefe Kaza Sivil lidera husi feto, nomos Diretora Jeral, Asesora, nomos Kondenadora lidera mos husi feto.
(eme)
