BAUKAU, STLTIMORLESTE.com – Bazeia ba lei numeru 03/2017, 05 Junhu kona-ba rejime espesial ba definisaun titularidade bens no movies, feto iha dereitu atu sai nain ba propiedade privadu hanesan rai.
Deklarasaun nee hatoo husi Vokal Point Sekretariu Estadu Igualidade Munisipiu Baukau, Domingas Soares iha ambitu sosializasaun dekretu lei numeru 03/2017, 05 Junhu kona-ba rejime espesial ba definisaun titularidade bens no movies no prevensaun violensia domestika tuir lei numuru 07/2010 ba entidades sira, iha salaun apuramentu Vila Nova Baukau, Kuarta (25/03/2026).
“Importante tebes lei nee vigora ona iha tinan 2017, maibe maioria feto maluk seidauk iha informasaun, tanba feto sai nain ba rai sei minimu tebes,” dehan Domingas.
Vokal point nee katak, durante nee mane mak sempre sai nain ba propiedade familia, tanba sistema kultural, maibe tuir lei neebe eziste iha Timor Leste, feto no mane iha direitu hanesan ba propriedade familia, nunee liu husi sosializasaun lei refere bele loke entidades sira nia hanoin hodi fo oportunidade ba feto sira atu rejistu iha diresaun terras propriedade tuir regulamentu neebe estabelese ona.
Tanba iha Munisipiu Baukau husi numeru feto sira foin 10% sai nain ba rai, barak mak seidauk hetan oportunidade hanesan.
“Dadus lo-loos seidauk iha, maibe tuir informasaun neebe ami iha Munisipiu Baukau foin 10% deit mak rejistu sai nain ba rai,” Domingas akresenta.
Vokal point nee husu entidades sira atu kontinua hatutan ba feto maluk seluk liu-liu feto sira iha area rural neebe menus asesu informasaun, maibe bainhira informasaun sira too iha area rural ho esperansa bele asegura feto labele sai vitima ba rai bainhira divorsiu iha futuru.
Enkuantu lei numeru 13/2017 5 Junhu, kona-ba rejime espesial ba definisaun titularidade bens imovel buka klarifika situasaun juridika kona-ba nain ba rai, no halo efetivu dimensaun oin oin direitu
propriadade privada nian, neebe prevee ona iha artigu 54.º nº 1 Konstituisaun Republika Demokratika Timor-Leste.
Iha lei refere mos husi artigu 4 hateten, igualdade ba direitu sira katak, direitu propriedade ba bein imovel sei asegura ho
kondisaun hanesan ba mane no feto, no bandu kualker forma atu halo diskriminasaun ba titularidade, asesu, jestaun, administrasaun, gozu, transferensia ka dispozisaun bein imovel nian.
Entretantu sosializasaun lei rua nee hetan partisipasaun husi reprezentante Asosiasaun Feto, Diretor Servisu Munisipal, Administrador Postu no grupu feto husi Postu Administrativu hamutuk nain 60 resin.
(tom)
