BAUKAU, STLTIMORLESTE.com – Servisu Rejistrasaun no Verifikasaun Emprezarial, Institutu Publiku (SERVE IP) Baukau hakarak Autoridade Munisipal Baukau iha ekipa integradu kontrola folin sasan no prazu sasan nesesidade baziku sira iha merkadu Munisipiu Baukau.
Koordenador SERVE.IP Baukau, Reinaldo António Mendonça hateten, SERVE.IP mak instituisaun estadu nian neebe halo prosesamentu lisensaementu ba emprezariu no negosiante sira hodi halao atividade komersiu iha Baukau, atu folin nesesidade baziku sira no seluk tan kontinua efetivu iha merkadu Baukau, mak parte Diresaun Servisu Ministeriu Komersiu Industria iha Baukau inklui Autoridade Munisipal Baukau tenke iha politika integradu neebe involve Autoridade kompetente sira seluk hodi monitoriza produtu nesesidade baziku sira nia folin no prazu sira.
“Politika integradu nee signifika atu instituisaun sira nee tenke toma nia papel, atu nunee fulan 3 ou 6 tun ba terenu kontrolu halo inspesaun ba sasan sira nia presu no prazu sira, maibe hau destaka iha nee kuaze fulan 8 resin ona mais seidauk realiza buat sira nee,” Koordenador SERVE.IP Baukau, Reinaldo António Mendonça hateten ba jornalista sira iha Tirilolo Baukau, Kuarta (25/03/2026).
Nia sublina, politika atu kria ekipa integradu nee, SERVE.IP Baukau aprezenta ona ba Autoridade Munisipal atu inisia enkontru involve Diresaun Servisu Munisipal no Ministerial relevante sira, tanba politika refere mak bele evita empreza sira manipula prazu no folin sasan neebe daudaun sai preokupasaun ba publiku.
Maibe politika refere hafoin aprezenta tiha ba Autoridade Munisipal Baukau, too ohin loron seidauk implementa politika refere.
“Tenke iha ekipa integradu, ita haree negosiante sira neebe faan sembako nee perigu ba ema nia saude, tanba ita konsumidor barak mak ba sosa sasan maibe espalha iha media balu prazu tiha ona mak cetak fali nia prazu halo foun fali,” katak Reinaldo.
Koordenador nee salienta, mezmu iha Munisipiu Baukau seidauk iha empreza ida mak SERVE.IP fo notifikasaun ba asaun manipula prazu sasan nesesidade baziku importadu sira, maibe atu evita asaun nee akontese tenke iha ekipa integradu hodi monitoriza loja sira kada trimestral.
Nia deklara, Autoridade releventa neebe Governu estabelese iha Munisipiu Baukau, atu monitoriza prazu sasan no folin nesesidade baziku importadu sira mak Diresaun Servisu Ministeriu Komersiu Industria, maibe Diresaun Servisu Ministeriu Komersiu Industria nee rasik seidauk halao servisu refere iha Baukau, tanba durante nee Diresaun refere laiha koordenasaun SERVE.IP Baukau halo monitorizasaun ba loja sira iha Baukau.
“Nee mak hau dehan, hau fulan 8 resin iha nee mais ami seidauk hetan konvite ruma lao hamutuk ou informa ami sira iha terrrenu,” nia konta.
(tom)
