BAUKAU, STLTIMORLESTE.com – Administrador Postu Baguia nafatin husu Ministeriu Obras Publikas (MOP) atu aselera dezenha ponte Gomilafa neebe lokaliza iha Suku Atelari, Postu Administrativu Laga, Munisipiu Baukau.
Administrador Postu Baguia, Mario Xavier da Silva esplika, ponte Gomilafa uniku dalan neebe durante nee fasilita konektividade movimentasaun transporte publiku no privadu husi Postu Baguia ba Baukau Vila, neebe ponte refere ezistensia durante tinan naruk ona, tanba konstrui iha tempu okupasaun Indonezia.
Nunee iha loron 16 Marsu nee ponte refere iha parte sorin monu, tanba kauza husi udan halo rai mamar, maibe iha momentu nee kedas parte kompanhia responsabiliza projetu reabilitasaun estrada diresaun Laga-Baguia halo kedas normalizasaun no daudaun movimentasaun transporte publiku no privadu diresaun Baguia-Baukau Vila lao normal.
Mezmu movimentasaun transporte publiku no privadu lao normal, maibe haree husi antiguidade ponte refere, mak Ministru Obras Publikas deklara ona atu konstrui ponte foun iha Gomilafa neebe daudaun iha prosesu dezenhu.
“Hanesan exelensia nia estetmentu iha media sira neebe mak ita akompanha katak sei iha faze dezenhu, entaun ita husu para aselera dezenhu sira nee, hodi halo konstrusaun iha tempu badak nia laran,” Administrador Postu Baguia, Mario Xavier da Silva hateten ba jornalista sira liu husi telefone, Kuarta (25/03/2026).
Nia komenta, konstrusaun ponte iha Gomilafa presiza atensaun husi Governu Sentral, tanba la inklui ho projetu reabilitasaun estrada diresaun Laga-Baguia neebe daudaun responsabiliza husi kompanhia internasional Norinco.
Nia sublina, husi kondisaun sira nee mak Prezidente Autoridade Munisipiu Baukau, Veneranda Lemos, iha loron 24 Marsu nee tun direita observa kondisoens sira husi ponte refere, neebe rezultadu sira aprezenta ona ba Ministru Obras Publikas liu husi via telefone.
“Exelensia Prezidente haree ponte nee no informa ba iha exelensia Ministru Obras Publiku, maibe exelensia tuir hela dalan, seidauk iha resposta ba Prezidente,” Mario akresenta.
Entretantu kondisaun ponte Gomilafa atual neebe STL nota, mezmu parte kompanhia halo ona normalizasaun iha parte rai monu hodi fasilita movimentasaun sira, maibe nafatin iha kondisaun ameasa, tanba kondisaun aat no medida ponte refere kloot.
(tom)
