DILI, STLTIMORLESTE.com – Observador Ekonomiku sira iha rai laran kestiona makaas kualidade kontrusaun estrada rural sira, neebe fasil tebes nakfilak ba tahu dodok bainhira tempu udan. Situasaun nee konsideira hanesan rezultadu husi planneamentu neebe fraku no motitorizasaun neebe la lao ho masimu.
Tuir Observador Ekonomiku, Delfin de Araujo katak, kestaun estrada aat nee laos fali kestaun foun, maibe sai hanesan moras kroniku neebe repete tinan tinan. Nia haree katak projetu reabilitasaun barak mak foka ba emerjensia laho kualidade neebe sustentavel.
“Ita haree katak dezenvolvimentu ita nia estrada nian sei atoladu hela iha tahu laran, Estadu hasai osan milhaun ba mihaun, maibe kualidade obra iha baze la tuir kriteiru neebe diak, udan dala balu deit, rai mutin neebe fakar iha leten suli lakon hotu ba mota laran,”dehan Delfin ba STL, iha Akait, Dili, Kuarta (25/03/2026).
Delfin mos fo hanoin katak, sistema drainajen neebe la diak sai hanesan kauza prinsipal ba estrada sira neebe naksobu. Bainhira bee la iha dalan atu suli, bee nee sei hobur iha estrada leten no sobu tiha estrutra rai neebe iha.
“Se ita hakarak dezenvolvimentu neebe loos, labele taka deit rai kuak ho rai mutin. Presiza kontrusaun neebe usa asfatu kualidade no sistema bee dalan neebe loos. Se lae povu iha Munisipiu sira sei kontinua sai prizioneiru ba tahu tinan ba tinan,” nia hatutan.
Aleinde nee sira mos kestiona seriedade husi kompaniha sira neebe ezekuta projetu no mos papel husi fiskalizasaun Governu nian. Tuir nia tebke iha responsabilidade legal ba kompania sira neebe halo obra ho kualidade neebe la too kriteiru, tanba nee kauza deit prejuizu ba kofre estadu.
Tanba impaktu husi estrada neebe tahu dodok nee laos deit ba transporte, maibe mos hamate roda ekonomia rural, tanba produtu agrikola husi agrikultura sira labele asesu ba merkaduria ho tempu neebe loloos.
Iha parte ketak Akademista UNDIL, Pedro da Conceicao husu ba Ministeiru Obras Publika (MOP), atu laos deit foka ba projetu foun, maibe mos tau prioridade ba manutensaun estrda suku sira neebe sai hanesan tutan moris ba ekonomia povu kiik nian.
(car)
