DILI, STLTIMORLESTE.com – Estudante sira tenke estuda didiak hodi prepara aan ba aban bainrua, tanba futuru nasaun ida nee iha estudante sira nia liman.
Liafuan nee haktuir husi Visi Ministra Solidariedade Sosial no Inkluzaun, Céu Brites ho ekipa bainhira halo vizita ba estudante neebe asesu ba Bolsa da Mãe (BdM), kondisional iha eskola 3 hamutuk ema nain 324, iha Postu Administrativu Manatuto, Munisipiu Manatuto, Iha Tersa (24/03/2026).
Liu husi komunikadu neebe STL asesu husi media MSSI Kuarta (24/03/2026) hatete, estudante neebe asesu ona ba BdM kondisional iha eskola 3 mak hanesan Eskola Ensino Sekundáriu Jeral Kay-Rala, Manatuto hamutuk ema nain 38, Sentru Aprendizajen no Formasaun Eskolar (CAFE), Manatuto hamutuk ema nain 150, Eskola Ensino Sekundariu Jeral Santu António (ESSA), Manatuto hamutuk ema nain 136.
Iha vizita nee, Visi Ministra husu ba estudante sira atu estuda didiak hodi prepara an ba aban bainrua, tanba futuru nasaun ida-nee iha estudante sira-nia liman no Visi Ministra, simu husi Diretur no Koordenador eskola 3 inklui manorin no estudante sira.
Iha vizita nee akompaña mos husi Diretur Sentru Solidariedade Sosial no Inkluzaun Munisípiu Manatuto, Jose Juvencio Soares Francisco.
Remata husi vizita nee, Visi Ministra kontinua halo viziita kortejia Sentru Paz Sta. Isabel Manatuto. Vise Ministra too iha sentru refere no simu direta husi Diretora Sentru Paz Sta. Isabel ho estudante sira.
Sentru Paz Sta. Isabel Manatuto hanesan sentru formasaun integral ba joven no labarik sira ho objetivu promove no haburas benefisiarius nia kapasidade espesifiku hodi bele assegura an iha mundu traballu.
Sentru oferese formasaun iha area mak hanesan, ospitalidade jeral, produsaun hahan, informatika, bordadu makina, bordadu kiman, pontu cruz no atividade tempu livre-ATL iha fatin refere.
Iha fatin nee Visi Ministra haree direita labarik sira tuir atividade tempu livre, fatin formasaun no dormitóriu iha Sentru Paz Sta. Isabel Manatuto.
(dom)
