DILI, STLTIMORLESTE.com – Polemika ordenamentu sidade iha kapital Dili kontinua hamosu kestionamentu boot husi publiku kona-ba kbiit Governu nian hodi aplika lei ho balansu. Maibe Polisia Munisipal sira kontinua foti asaun makaas hodi duni sai vendedor ambulante sira iha dalan ninin, Governu rasik parese nonok hasoru dominasaun loja boot sira neebe okupa ona fatin estratejiku hotu iha sidade laran.
Iha fulan hirak ikus nee, operasaun hamoos pasadeiru iha area sidade nian kria situasaun neebe manas. Vendador sira neebe faan modo, hahan no sasan neseidade loron loron nian tenke halai taru ho autoridade hodi salva sira nia sasan neebe dala barak foti tiha husi Polisia Munisipal.
“Ami sente Governu nee maks deit ba ami neebe la iha kbiit. Se ami faan iha dalan ninin, dehan ami kria foer no tranzitu. Maibe loja boot sira neebe estranjeiru mak nain, sira foti fatin estratejiku hotu. Governu la kolia buat ida buka duni deit mak ami,” dehan vendador ambulante ida ho naran, Marcos Oliveira ba STL, iha mini merkadu Prenuas, Dili, Kinta (26/03/2026).
Realidade hatudu katak investor boot sira liuliu husi Xina, iha kbiit finanseiru neebe boot hodi domina fatin fatin neebe besik konsumidor. Enkuantu povu rai nain neebe laiha kapital hodi aluga uma loja, tenke uza deit triotoar ka marajin sidade nian hodi buka moris, maibe ikus mai duni sai fali hanesan kriminal.
Entretantu Observador Politika, Justino Monteiro kestiona padraun neebe governu uza. Se objetivu mak sidade neebe organizadu. Governu mos tenki kria espasu neebe eklibiradu, labele husi deit osan boot mak manda iha sentru sidade, enkuantu povu kiik duni ba fatin neebe dook husi sirkulasaun osan nian.
“Ordenamentu sidade laos deit konba-ba duni ema. Nee kona-ba oinsa kria fatin ba ema hotu. Se loja boot sira bele iha fatin estratejiku, Governu mos tenke prepara kios ka fatin dignu ba vendedor sira iha area neebe hanesan, laos duni sira deit sira ba Manleuana, Bekora ka Taibesi neebe dook husi konsumidor ka kliente sira,” hatete Justino.
(car)
