DILI, STLTIMORLESTE.com – Jurista Timoroan konsidera katak, kazu roo Haksolok, Prokurador titular tenke barani atu deside opsaun ida akuza ka arkiva.
Tuir Jurista Sergio Dias Quintas katak, nuudar sidadaun husu MP barani no korajen hasoru dezafiu, hodi konklui investigasaun.
“Entaun ita hotu nuudar sidadaun husu ba MP neebe kaer prosesu tenki barani no korajen hodi enfrenta dezafiu nee para labele halo kazu nee sai kleur demais, karik iha prova sufisiente bele akuza tuir artigu 236 husi kodigu penal, karik la hetan indisiu sufisiente ba krime ruma bele arkiva tuir artigu 235 kodigu penal, tanba ida nee mak konkluzaun MP nian,” dehan Jurista Sergio Dias Quintas ba STL iha Kaikoli, Kinta (26/03/2026).
Nia hatutan, kazu roo Haksolok kazu ida neebe sita atensaun makaas husi ita nia sosiedade, no deskonfia involve husi figura sentral sira iha Timor Leste, tanba nee mak halo kazu nee sai boot no komplexu hodi hamosu dezafiu iha Ministeriu Publiku.
Sergio esplika, Ministeriu Publiku neebe sai titular ba prosesu ida nia mak tenki barani no korajen hodi enfrenta dezafiu sira nee, se lae prosesu ida nee sei la deskobre verdade material.
Reforsa tan, iha Kodigu Penal artigu 48 numeru 1 dehan katak, Ministeriu Publiku mak kaer asaun penal, no iha artigu 227 husi Kodigu nee mos dehan katak, Ministeriu Publiku mak iha kompetensia atu dirije no halo rasik ka autoriza ema seluk halo aktu neebe lei rezerva ba nia.
Iha fatin ketak, Akademiku UNTL, Sebastiao Dos Santos dehan, presiza konklui lalais investigasaun ba Ro Haksolok, hodi labele hamosu polemika.
“Hau hanoin presiza duni halo investigasaun klean hodi konklui kazu ne, tanba kazu nee dada atensaun publiku nian,” dehan nia.
Hatutan tan, importante duni konklui prosesu nee, hodi hatene se maka envolve iha prosesu nee, atu labele hamosu duvidas iha publiku.
Antes nee Prokurador Jeral da Republika, Nelson de Carvalho dehan, kazu Ro Haksolok investigasaun sei lao hela.
“Kazu ida nee kompleksidade uitoan, neebe investigasaun tenke klean, no iha hela investigasaun nia laran, “Dehan PJR.
Hatutan, Instituisaun sira neebe konjugadu ho Ministeriu Publiku, sempre servisu hamutuk, hodi hare konaba kazu nee.
(ter)
