DILI, STLTIMORLESTE.com – Prezidente Republika (PR), Jose Ramos Horta husu Embaixadora Timor Leste ba ASEAN, Elisa da Silva atu foka liu ba Pilar tolu (3) neebe Timor Leste presiza halo ba adezaun tomak ba ASEAN.
Bainhira remata hasoru malu, Embaixador Timor Leste ba ASEAN, Elisa da Silva ba jornalista sira iha Palasiu Prezidensial Nicolau Lobato, Bairo Pite, Kinta nee (26/03/2026) hatete, mai agradese ba Prezidente ba konfiansa neebe fo ba nia, aleinde nee husu mos hanoin ruma husi Prezidente.
Embaixadora hatete, iha hasoru malu ho Prezidente Republika, rekomenda ba Embaixadora atu foka liu ba pilar tolu neebe daudaun Timor Leste iha ninia kompromisu ba adezaun tomak ba ASEAN hodi foka ba pilar xave 3 hanesan Komunidade Polítika-Seguransa, Komunidade Ekonomika, no Komunidade Sosiu-Kultural.
“Ohin hau mai hasoru sua exelensia sr Prezidente premeiru agradese ba fiar neebe fo mai hau, responsablidade neebe fo mai hau atu sai embaxador ba ASEAN, Segundu mak husu prezidente nia hanoin saida mak hau sei halo no prioridade saida mak presiza halo,” dehan Embaixadora.
Rekomenda saida mak Prezidente rekomenda hela ba embaixadora atu halo iha embaixadora nia mandatu hatan ba kestaun nee embaixasdora dehan, sira sei haree liu ba assuntu asean sira.
“Haree liu ba asuntu asean sira liu liu liga ba pilar tolu neebe iha koperasaun neebe ASEAN iha oinsa mak koperasaun ida nee nia benefisiu mos ba Timor Leste I koalia mos ita nia preparasaun iha 2029 nee,” dehan Embaixadora.
Prezidente Republika mos fo hanoin ba Governu atu deside ona tema neebe Timor Leste sei koalia iha tinan oin mai.
“Tema saida mak ita sei lori hodi prezide ASEAN iha 2029 nee so ida nee mak mensajen neebe senhor Prezidente husu, maibe senhor Prezidente husu rasik ho senhor Primeiru Ministru atu haree ida nee maibe nia hakarak fo hanoin deit katak agora tenke hanoin ona tema saida mak ita atu tau,” dehan Embaixadora.
Timor Leste aselera daudaun ninia kompromisu ba adezaun tomak ba ASEAN hodi foka ba pilar xave tolu Komunidade Polítika-Seguransa, Komunidade Ekonomika, no Komunidade Sosiu-Kultural. Esforsu nee, lidera hosi Primeiru-Ministru Xanana Gusmão, ho objetivu atu prepara nasaun nee ba integrasaun tomak no lideransa ASEAN nian iha tinan 2029. Estabelese ona grupu traballu tekniku ida hodi garante kumprimentu ba rekizitu sira.
(eme)
