DILI, STLTIMORLESTE.com – Primeiru Ministru (PM), Kay Rala Xanana Gusmão hatete, rezultadu reuniaun Konselhu Superior Defeza no Seguransa ohin la autoriza atu koalia sai iha publiku.
Prezidente Republika Jose Ramos Horta prezide Reuniaun Konselhu Superior Defeza no Seguransa, iha Palasiu Prezidensial Nicolau Lobato, Bairo Pite, Kinta nee (26/03/2026) hodi diskute asuntu neebe relevansia liga ho seguransa nomos relevansia nasional, maibe desizaun labele koalia ba iha publiku.
Bainhira remata reuniuan KSDS, Primeiru Ministru Kay Rala Xanana Gusmão ba jornalista sira iha Palasiu Prezidensial hatete, ohin halo enkontru semanal ho Prezidente Republika Jose Ramos Horta, no remata relata servisu Governu ba Xefe Etadu kontinua partisipa iha reuniaun Konselhu Superior Defeza no Seguransa neebe prezide husi Prezidente Republika, maibe desizaun hotu la autoriza koalia sai ba iha publiku.
“Depois koalia tiha ho Prezidente ami mai reuniaun Konselhu Superior Defeza Seguransa, neebe iha asuntu balun iha neeba kona-ba buat oin oin neebe hau la autoriza atu koalia iha nee,” dehan Primeiru Ministru.
Bainhira remata enkontru semanal ho Primeiru Ministru Kay Rala Xanana Gusmão, Prezidente Republika, Jose Ramos Horta prezide reuniaun sesaun Konselhu Superior Defeza no Seguransa (CSDS) nian.
Sorumutu nivel aas neebe partisipa husi Primeiru Ministru no ofisial xave Estadu nian seluk, foka liu ba asuntu estratejiku oioin kona-ba seguransa nasional no defeza, neebe nia detalhu espesífiku sira kontinua konfidensial atu proteje interese Estadu nian.
Reuniuan Konselhu Superior Defeza no Seguransa marka prezensa husi membru sira husi Prezidente Republika Jose Ramos Horta, Primeiru Ministru Kay Rala Xanana Gusmão, Ministru Interior, Francisco da Costa Ministru Justisa Sergio Hornai, Ministru Negosiu Estranjeiru no Koperasaun MNEK Bendito Freitas, Xefe Estadu Maior Jeneral FALINTIL Forsa Defeza Timor Leste, F-FDTL, Tenente Jeneral Falur Rate laek, Komandante Jeral Polisia Nasional Timor Leste PNTL Henrique da Costa, Reprezentante husi deputadu sira iha parlamentu Nasional David Dias Mandati, Diretor Jeral Serbisu Nasional Intelejensia Longuinos Minteiro no seluk tan.
Reuniaun Konselhu Superior Defeza no Seguransa hahu iha oras tuku 10 no remata iha oras tuku 13 meudia.
(eme)
