DILI, STLTIMORLESTE.com – Ekipa husi Banco Central Timor Leste (BCTL) ho entidade relevante kontinua halo sosializasaun kona-ba moeda 200 centavos ba sosiedade nomos loja sira, nunee kontinua simu moeda Timor nia rasik.
Kestaun nee hatoo husi Governador BCTL, Helder Lopes ba jornalista sira, bainhira remata halo enkontru ho Prezidente Republika Jose Ramos Horta iha Palasiu Prezidensial Nicolau Lobato, Bairo Pite, Sesta (27/03/2026).
Aleinde nee Governador BCTL hamutuk ho ekipa mos update ba Prezidente Republika sobre preparativu sira neebe banco central halo liga ho moeda rasik.
“Ohin ami entrega dokumentu ida ba exelensia I kontinua hetan orientasaun husi ita nia nain ulun sira saida mak banco central bele halo hodi hametin ita nia ekonomia nomos sekarik aban bainrua iha futuru mak ita iha moeda rasik ita bele mitiga soke ho risku sira neebe ke dala ruma mosu tanba instrudusaun moeda rasik,” katak Governador BCTL.
“Foin daudaun ita boot sira akompanha iha polemika oituan sobre 200 centavos, ami atualiza ba exelensia Prezidente katak situasaun ida nee rezolvidu ona, rezolvidu iha sentidu agora iha situasaun kalma no ami kontinua hola medida hodi servisu hamutuk ho entidade relevante balun halo sosializasaun ba ita nia moeda sira nee para ita nia sosiedade bele hatene, depois ita ba koalia ho ita nia loja sira neebe duvida ho moeda 200 centavos katak moeda nee orijinal, nunee sira simu,” nia dehan.
Nunee mos iha parte seluk iha instituisaun relevante sira mos kontinua halo investigasaun ba sira nia serbisu hodi investiga autor sira neebe falsifika moeda 200 centavos iha rai laran.
Governador hatete medida neebe banku central halo nee fahe ba rua ida mak medida temporaria nemak halo sosializasaun serbisu hamutuk ho entidade relevante Governu nia ba halo sosializa sobre moeda asli TL nia nomos hatete ba entidade komersial sira para komprende.
“Maibe medida ba mediu too longu prazu mak ita ba ho dizitalizasaun neebe dadaun BCTL elabora hela prepara iha tempu badak pagamentu sira nee ita sei promove dizitalizasaun hodi nunee halo pagamentu ho dizital nunee preokupasaun sobre osan falsu ema falsifika ida nee ita bele mitiga oituan,” katak Governador.
Nunee mos Visi Governador BCTL, Sara Lobo Brites hatutan Relativamente ho sosializasaun ekipa hamutuk ho MCI halo uluk sosializasaun iha Dili laran ba loja husi Xina nomos loja lokal sira tuir mai sei prekore mos munisipiu sira.
“Neebe karik semana oin mak ekipa sei tun prekore munisipiu sira hotu para bele hetan imformasaun ba ita nia sidadaun sira,” katak nia.
Liga ho Investigasaun ba autor neebe mak falsifika moeda 200 centavos ekipa kontinua halo investigasaun.
(eme)
