DILI, STLTIMORLESTE.com – Loron ida molok selebrasaun Dominggu Ramos, sidade Dili hahu nakonu ho vendador Ramos neebe namkari iha fatin fatin, hahu husi kruzamentu boot too merkadu sira, vendador sira oferese ramos neebe halo husi tahan nuu, palmeira no seluk tan ba komunidade ka sarani sira.
Tuir observasaun jornalista STL iha terenu haree katak, vendedor sira laos mai deit husi sidade laran, maibe balu tula husi foho hodi mai faan iha kapital. Folin ramos ida faan ho presu variadu, hahu husi 50 sentavus too US$ 1, depende ba kualidade ramos neebe sira dekora ka prepara.
“Ami lori mai iha dadersan nee, komunidade sira mos sosa ona hodi prepara ba misa aban, tanba ramos nee importante tebes ba ita sarani katolik sira, hodi hanoin hikas Jesus nia tama ba Jeruzalem,” dehan vendedor ida ho naran, Jose da Costa ba STL iha Bairo Pite, Dili, Sabadu (28/03/2026).
Iha sorin seluk sarani ka komunidade sira mos sente kontente, tanba bele sosa ramos ho fasilidade neebe besik. ”Ami sosa ohin para aban lori ba amululik fo bensaun hanesan simbolu ida, hodi hanoin hikas ksolok povu Jeruzalem nian bainhira simu Jesus Kristu nuudar liurai,” hatete sosa nain ida Tia Luciana Monteiro.
Entretantu Dominggu Ramos hanesan biban ba sarani sira atu lori ramos ba igreja hodi simu bensaun husi amululik. Selebrasaun nee mos marka inisiu ba semana santa neebe sei remata iha loron paskua.
Nunee mos iha parte seluk movimentu iha kapital Dili hahu hafoun, tanba sarani sira sosa deit ramos iha dalan ninin no sira la presiza ona ba buka rasik iha foho ka toos.
(car)
