DILI, STLTIMORLESTE.com – Unidade Apoiu Servisu (UAS) realiza atividade Marsa Forsada ba Membru FALINTIL – Forsa Armada Timor Leste (F-FDTL) atu aumetan sira nia kondisaun fiziku no mental militár sira nian, hodi asegura katak prontu nafatin kumpri kualker misaun neebe Komando F-FDTL atribui ba UAS.
Nia dehan, atividade Marfor ida nee hanesan programa anual neebe kada tinan sempre implementa ba Komando F-FDTL nia laran, tanba nee mai iha UAS foin realiza atividade ida tan.
“Ninia objetivu prinsipal mak nee, oinsa ita mantein estadu fiziku no mental forsa sira nian, nunee ita prontu nafatin kualker misaun neebe Komando F-FDTL iha no atribui mai ami no mos prontu atu ezekuta,” hatete Komandante Unidade Apoiu Servisu (UAS), Major Horácio dos Santos Baptista “Upulai” ba jornalista sira iha Metinaro, Sesta (27/03/2026).
Nia esplika, atividade Marfor nee sira neebe UAS deit, oin nee ezersisiu 14 kilometrus, maibe iha tinan ida labele hein matrix, maibe Komando iha hanoin iha inisitiva rasik sei halao atividade Marfor nee.
“Hau haree hau nia soldadu sira ohin halao atividade Marfor ida nee ho kontenti laiha asidente, hanesan ain kanek no ain moras lao labele nee laiha, ami hotu-hotu ohin nee enerjia hanesan no hotu-hotu lao too mai iha nee,”.nia deklara.
Entretantu ezersísiu nee partisipa husi Komandante UAS, Major Horácio dos Santos Baptista “Upulai”, Segundu Komandante UAS, Major Vilanova dos Reis no mos ofisiais, sarjentu sira no prasa sira hotu iha Unidade Apoiu Servisu. Sira halo marsa ho distánsia 14 km, hahu husi Behau to’o iha baze Unidade Apoiu Servisu.
Iha nia mensajen ba membru sira, Komandante UAS hatete katak, aleinde halo ezersísiu iha unidade, kada militar idak-idak presiza halo ezersísiu regularmente. Nia mos haktuir katak iha tempu ohin loron, moras barak mosu tanba falta atividade fizika, tanba nee importante atu halo ezersísiu no kontrola hahan, liu-liu hahan neebe saudável.
(jen)
