BAUKAU, STLTIMORLESTE.com – Kompanhia Vage’el Unipessoal Lda halo ona alargamentu iha projetu reabilitasaun estrada urbana Baukau Vila pakote daruak neebe kobre husi rotunda Vila Nova too area Suku Tirilolo Baukau Vila.
Enjineiru husi Kompanhia Vege’el Unipessoal Lda, Frederico Rodrigues Fernandes esplika, hafoin lansamentu fatuk dahuluk ba projetu reabilitasaun estrada urbana Baukau Vila parte kompanhia Vage’el Unipessoal Lda implementa servisu iha terrenu tarde, tanba tarde husi ordem trabalhu, maibe dadaun parte kompanhia halao ona servisu iha terrenu.
“Ami nia servisu foin halao cleaning deit. Ami nia cleaning husi bundaran mai iha Edukasaun nian, komesa fali husi Tribunal tun mai iha Vizaun Kristaun nia oin no jalur tun mai BCNTL nian,” hateten Enjineiru Kompanhia Vege’el Frederico Rodrigues Fernandes ba jornalista sira iha Vila Nova Baukau, Segunda (30/03/2026).
Nia sublina, alargamentu neebe parte kompanhia Vege’el halao ona mak hahu husi rotunda Vila Nova too iha Igreja Vizaun Kristaun Tirilolo neebe kobre mos husi bairo Rakalele ba edifisiu Tribunal Distrital Baukau no seluk mak diresaun husi bairo X-Burry ba Banku Nasional Komersiu Industria Timor-Leste enkuantu diresaun husi rotunda Vila Nova ba area estadium Laikana Vila Nova Baukau la inklui iha alargamentu refere.
Nia fundamenta, husi alargamentu estrada iha area hirak nee kobre ba kilometru 2.300 metru neebe kuaze servisu dahuluk konklui ona limpeza sira no hein kontinuasaun eskavasaun bee dalan.
“Ami atu kontinua tan ba eskavasaun bee dalan maibe agora seidauk tanba problema oituan iha dokumentus seidauk hatama,” Frederico akresenta.
Enjineiru nee deklara, servisu eskavasaun bee nian parte kompanhia seidauk implementa, tanba seidauk submete dokumentus ba ekipa destakadu Ministeriu Obras Publikas Baukau, maibe parte kompanhia sei submete iha loron 31 Marsu nee hodi kontinua ba servisu eskavasaun bee dalan nian iha terrenu.
Iha sorin seluk, Koordenador Tekniku Obras Publikas Destakadu Munisipiu Baukau, Diego Cipriano Caleza informa, parte kompanhia Vege’el Unipessoal Lda halao ona servisu iha terrenu hafoin hetan karta ordem servisu husi Ministeriu Obras Publikas.
“Hau hanoin ita seidauk koalia kona-ba progresu maibe servisu faze preparasaun sira hahu hamoos cleaning sei hadia dezenhu balu neebe prezisa halo koreksaun hodi ajusta ba kondisaun terrenu neebe iha, dezenhu laos sala, maibe prezisa halo ajustamentu tuir terrenu neebe iha,” Diego hateten.
Nia komenta, parte kompanhia Vege’el seidauk bele kontinua halao servisu eskavasaun bee dalan iha terrenu, tanba prezisa halo ajustamentu dezenhu tuir terrenu nunee la prejudika ba kualidade projetu iha terrenu, tanba parte kompanhia JOVA Construction Unipessoal Lda neebe responsabiliza ba pakote dahuluk diresaun husi area rotunda Wainiki too rotunda Vila Nova halao ona eskavasaun bee dalan no seluk tan, hetan ona ajustamentu dezenhu tuir kondisaun terrenu.
Entretantu tuir dadus neebe STL iha, projetu reabilitasaun estrada urbana Baukau Vila diresaun husi area rotunda Wainiki Suku Bahu too area Suku Tirilolo responsabiliza husi kompanhia rua mak hanesan kompanhia JOVA Construction Unipessoal lda responsabiliza diresaun husi area rotunda Wainiki too rotunda Vila Nova Baukau Seksaun 00+000-02+880.0 ho valor orsamentu US$ 4,735,021.55 no Seksaun 1 – 5 diresaun husi rotunda Vila Nova too area Igreja Vizaun Kristaun Tirilolo responsabiliza husi kompanhia Vage’el Unipessoal Lda ho valor orsamentu US$ 3,764,933.21.
Husi projetu refere fiskaliza husi Ministeriu Obras Publikas ba durasaun servisu tinan 2 tuir planu finaliza iha 2027.
(tom)
