DILI, STLTIMORLESTE.com – Eskola Sekundáriu Jeral (ESJ) 10 Dezembru Komoro sei halo proposta ba Ministériu Edukasaun (ME) liu husi Edukasaun Munisipiu Dili, hodi husu apoiu kaderneta ba estudantes foun.
Kestaun nee hatoo husi Diretor Eskola Sekundariu Jeral 10 Dezembru Komoro, Manuel Verdial ba STL iha Komoro, Segunda nee (30/03/2026).
“Kaderneta eskolar hau prepara ona proposta pedidu ba ME liu husi Servisu Edukasaun Munisípiu Dili, atu prepara fali kaderneta foun ba ami nian estudantes numeru ida atus neen nee ba estudantes foun periode 2026, pedidu proposta nee tuir lo-loos ohin atu ba hatama ona, Tersa ou Kuarta ami bele hatama,” nia esplika.
Tuir Manuel katak, kada tinan sempre nunee hela deit, tanba estudantes foun sira nee presiza halo fali pedidu proposta ba ME hodi nunee bele fo apoiu kaderneta ba eskola atu bele priense valor estudantes sira nian, tanba nee estudantes ba desimu primeiru, desimu segundu nee kaderneta iha nanis ona.
“Ita nian estudantes desimu ano nee mak foun ba sira, neebe ita tenke lori fali total estudantes nee ba fila-fali ministeriu, atu nunee ministeriu bele halo preparasaun ba numeru ida nee. Ami nian proposta prepara ona, numeru estudantes IPA no IPS hira,” dehan nia.
Iha fatin seluk, Diretor Servisu Edukasaun Munisípiu Likisa, Julio da Silva katak, kona-ba kaderneta eskolar ba eskola sira iha Munisípiu Likisa sufisiente hela, tanba foin daudaun nee halo pedidu ba ME no foin haruka mai ona ba eskola nivel ensinu baziku sira iha Munisípiu Likisa.
“Ami haruka pedidu ba ME nasional no foin daudaun haruka kaderneta kuaze 500 nunee ba ita nian nivel ensinu baziku, tanba terseiru periodu nee mai tiha ona, daudaun nee ita aumenta tan, tanba iha Likisa la hetan, tanba nee ita nian pedidu ba husu 500 para fahe ba iha agrupamentu no fahe ona ba sira,” dehan nia.
Julio hatutan, falta sentral ida ou rua ou tolu mak seidauk foti sira nian kaderneta, tanba haree ba iha iklima, tanba nee kona-ba kaderneta iha eskola sira Munisipiu Likisa laiha problema, tanba pedidu tama ba ME no ministériu responde kedas, nee duni laiha problema.
(jac)
