DILI, STLTIMORLESTE.com – Estudantes husi eskola hotelaria no turizmu Bekora hamutuk 400 sei partisipa iha avaliasaun modular.
Haktuir Diretor Eskola Hotelaria no Turizmu Bekora, Charles F. Guterres ba jornalista STL iha Becora, Segunda nee (30/03/2026).
“Ami nian eskola tekniku Vocational la adopta ezame periodiku, maibe estudantes sira sei partisipa deit iha avaliasaun modular, signifika katak bainhira manorin sira hanorin hotu topiku sira neebe eziste iha modul ida nia laran mak sira direitamente halao kedas avaliasaun modular. Estudante atual iha ESTV – EHT Bekora hamutuk 400. Avaliasaun modular nee depende ba profesores neebe hanorin,” nia informa.
Nia dehan, Eskola Hotelaria no Turizmu Bekora iha departamentu tolu, nee mak hanesan departamentu hotelariia, kulinaria no departamentu modelagen, departamentu tolu nee mak agora daudaun eziste hela iha eskola refere.
Iha fatin seluk, Diretor ESJ nu. 4 Setembru Balide, Sergio A. da Cruz dehan, kona-ba pontus ezame ninia sira seidauk prepara, tanba aban Sabadu sira foin halao enkontru ho profesores sira, nunee sira bele kria komisaun organizador ba iha ezame ninia. Agora kona-ba sala neebe atu uza ba iha ezame nee sei problema, tanba sala ualu mak sai risku ba inundasaun.
“Kona-ba ezame nian, aban Sabadu ami enkontru hodi koalia kona-ba ami nian preparasaun, tuir numeru estudantes neebe mak legalmente nee iha 1732, numeru estudantes ida nee mak sei partisipa iha ezame primeiru periodu, ida nee tuir lista neebe mak orijin, karik iha ezame ninia laran mak la too ida nee signifika dehan balun iha problema, ida nee ita la hatene,” tenik nia.
Nunee mos Liliana dos Rego hanesan estudante hatete, kada loron ba eskola hodi partisipa iha ensinu aprendizajen, tanba iha tempu besik nia laran sira sei partisipa iha ezame primeiru periodu.
“Nuudar estudante kada loron hau sempre mai iha eskola hodi partisipa iha prosesu ensinu aprendizajen,” nia afirma.
(jac)
