DILI, STLTIMORLESTE.com – Eskola Hotelaria no Turizmu Bekora sei hetan orsamentu husi Ministériu Edukasaun (ME), hodi bele sosa ekipamentus pratika ba estudantes sira.
Liafuan nee hatoo husi Diretor Eskola Hotelaria no Turizmu Bekora, Charles F. Guterres katak, tinan ida nee eskola Hotelaria no Turizmu sei hetan orsamentu husi ME, neebe apoiu atu sosa ekipamentus pratika ba estudantes sira iha departamentu tolu neebe daudaun nee eziste hela iha eskola refere.
“Kona-ba ami nian ekipamentus pratika nian ba estudantes sira. Ekipamentu pratika ba tinan ida nee sei hetan ajuda US$ 20.000 husi ME. Total profesores permanente 30, staf ADM 2, guarda eskola 3. Kada loron ami nian estudantes sira halo pratika, kona-ba apoiu orsamentu husi ME nee, fo primeiru 50% depois ezekuta hotu no submete ninia relatoriu mak fo tan 50 %,” dehan Charles ba STL iha Bekora Segunda nee (30/03/2026).
Nia hatutan, estudantes sira halao pratika durante oras tolu nia laran, proposta osan nian asina tiha ona no sei levanta iha banku depois de paskua, maibe bazeia ba proposta neebe hatoo husi departamentu sira. Osan sei utiliza ba School Administration, sosa ekipamentu pratika, sosa rekursu aprendizajen hanesan LCD, laptop no projetor, kona-ba sira sira nian profesores daudaun nee sufisiente ona.
Iha fatin seluk, Diretor Nasional Ensinu Sekundariu iha ME, Benjamin Gomes da Cruz Fernandes hatete, husi ME nafatin fo apoiu ekipamentus pratika ba eskola hirak neebe sei menus ekipamentus.
“Ita nafatin fo apoiu ekipamentus pratika nian ba ita nian estudantes sira, oinsa atu bele fasilita estudantes sira,” nia haktuir.
(jac)
