DILI, STLTIMORLESTE.com – Problema sala de aula, Eskola Sekundariu Nicolao Lobato seidauk iha sala laboratoriu, maibe konstrusaun agora daudaun sei hadia hela hodi prepara ba futuru.
Diretor Jeral Eskola Nicolao Lobato, Rui Lopes dehan, iha eskola nee fasilidade hanesan laboratorium mak sei hadia hela, tanba problema sala de aula menus, estudante sira uza hotu bá prosesu aprendizajen nian neebe agora dadauk sei hadia hela ba futuru.
Nia katak, bainhira atu halo pratika ruma nee fila fali ba Professor sira, maibe sala atu halo laboratorium mak la too, tanba sala sira neebe iha akumula hotu husi estudante sira. Kona bá fasilidade seluk hanesan meza no kadeira laiha problema, bele dehan sufisiente hela. Tanba laiha estudante ida mak tur iha rai ka tatuk iha iha kadeira ida.
“Iha eskola nee fasilidade neebe laiha mak laboratorium deit, maibe agora dadaun sei halo hela hodi prepara bá futuru nian,” dehan nia bá STL iha knar Fatin Eskola Nicolao Lobato Tasi-Tolu, Segunda (30/03/2026).
Maske laboratoriu seidauk iha, maibe profesor sira sempre halo pratika bá estudante sira iha sala, liuliu bá materia eksata sira.
Nia afirma, oras nee dadaun eskola elabora hela pontus ezame bá primeiru periodu nian. Eskola lao tuir kurrikulu edukasaun neebe governu liu husi Ministériu Edukasaun fo ona mai eskola. Ezame ba primeiru periodu nee tuir los lao iha dia 6 de Abril maibe tanba festa paskoa, entaun Ministeriu hasai fali sirkular ida katak, orariu ba izame nee muda fali bá loron 7 mak foin hahu too dia 12 de Abril.
Nia dehan, preparasaun bá izame periodu nian nee, eskola prepara iha ona komisaun. Lisaun sira neebe atu fo bá izame nee foti husi materia sira neebe manorin nain sira hanorin iha primeiru periode no materia sira neebe remata ona. Ida neemak sei fo izame ba iha primeiru periodu nian. Neebe lisaun bá ezame nian nee halo no prepara husi komisaun, neebe sei halao iha dia 7 de Abril nee.
Durante prosesu aprendizajen profesor no estudante la hasoru problema kona ba materia ruma neebe tarde, tanba eskola iha Professor permanenti neebe mai husi Ministériu Edukasaun nomos Professor neebe rekruta husi Eskola no Fundasaun mak hanorin, neebe laiha problema ruma ho materia sira durante prosesu aprendizajen. Tanba nee estudante sira hein estuda deit materia sira neebe fo ona hodi tuir izame primeiru periodu nian.
Total Estudante Ensinu Sekundariu Nicolao Lobato neebe atu partisipa iha izame periodu hamutuk 768, numeru nee kompostu husi estudante husi klasse siensia naturais no siensia sosiais husi desimu ano too desimu segundu ano. Neebe estudante desimu ano husi siensia naturais kompostu husi mane 56 no feto 40, siensia sosiais mane 38 no feto 58. Bá desimu primeiru ano siensia naturais estudante mane 59 no feto 61, siensia sosiais estudante mane 57 no feto 35. Bá desimu segundu estudante siensia naturais mane 81 no feto 90, entertantu estudante siensia sosiais mane iha 104 no feto 91.
Nia haktuir, prosesu aprendizajen eskola bá estudante sira hahu husi loron Segunda too Sesta, no iha Sabado estudante sira tuir atividade ekstra hanesan diskursu, desportu no musika. Atividade ekstra sira nee halao deit entre klasse eskola nian deit.
Propinas ba estudante sira kada fulan US$13, no estudante sira neebe eskola iha nee maioria mai husi Munísipiu Ermera, Bobonaro, Likisa no sira neebe hela iha area 12 Outobru Tasitolu nian.
Iha sorin seluk eskola Ida nee laiha Professor reforma, tanba maioria ho idade 50 mai kraik. Tanba nee kona ba numeru professor laiha problema. Professor hamutuk 39, neebe kompostu husi professor permanenti 18 no professor neebe eskola rekruta 21.
Manorin nain sira neebe hanorin iha nee mai ho background lisensiatura edukasaun, no sira neebe laos edukasaun ka area seluk maibe hetan formasaun husi edukasaun liu husi Infordepe mak fo formasaun ba sira.
(dom)
