DILI, STLTIMORLESTE.com – Bainhira harii ona Supremu Tribunal Justisa (STJ) mak sei tau Juiz nain 7 halao servisu iha neeba, hodi deside kona-ba prosesu sira neebe iha.
“Se deit mak ba tur iha STJ, tuir artigu 30 husi Lei organizasaun judisiaria, katak Juiz nain 7 mak sei tur iha neba, nain 4 mai husi Juiz kareira, restantes mai husi Majistradu Ministeriu Publiku no jurista meritu,” dehan Jurista Sergio Dias Quintas ba STL iha Dili, Segunda (30/03/2026).
Nia hatutan, ohin loron rekursu iha setor justisa sufisiente ona, tanba nee bele haree sira neebe priense ba rekezitus neebe iha, hodi koloka ba iha STJ.
Hanesan Timor oan konsidera, tempu ona atu harii STJ, tanba iha ona lei organizasaun judisiaria, lei numeru 25/2021 iha nia artigu 27, koalia konaba Supremu Tribunal Justisa, entaun lei eziste ona, agora governu mak tenki implementa.
Iha fatin ketak, Akademiku UNTL, Sebastião Dos Santos dehan, ohin loron Timor oan iha ona kapasidade, hodi servisu iha STJ.
“Hau hanoin Timor oan iha ona kapasidade hodi halao knaar iha STJ, hodi nunee lori justisa lao ba oin,” dehan nia.
Hatutan tan, STJ iha hatudu katak desizaun sira neebe parte balu la aseita, bele rekore too ba iha STJ tanba nia mak sai hanesan ultima desizaun.
Aleinde nee, Prezidente Tribunal Rekursu, Afonso Carmona dehan, edefisiu tuan Tribunal Judisial Primera Instansia Dili (TJPID) neebe lokaliza iha Mandarin, hahu ona halo rehabilitasaun atu sai hanesan edefisiu temporariu ba iha Supremu Tribunal Justisa (STJ).
“Agora ita komesa hadia uma tuan nee instalasaun temporariu iha neeba, hodi hein konstrusaun foun iha sorin Kaikoli besik Tribunal Rekursu nee,” dehan Prezidente Tribunal Rekursu.
Nia hatutan, prepara mos trenu ofisial justisa sira neebe mantein iha Tribunal Primera Instansia, Tribunal Rekursu no mos Tribunal Supremu. No prepara mos funsionariu tekniku sira, tama hotu iha pakote preparasaun nian, atu instalasaun remata, iha pakote boot ida preparadu atu ba halao servisu iha neeba.
Sublina, konaba orsamentu ba STJ seidauk preve sei sura hela, maibe sei instala ho andar lima.
Hatan konaba promosaun ba iha Juiz sira, nia parte dehan iha fulan Abril banhira Inspetor neebe halo inspesaun ba Juiz sira fo sai ona rezultadu, maka sei halo reuniaun ida hodi hare konaba promosaun nee.
“Promosaun ba Juiz liga ho rezultadu inspesaun, no prosesu lao hela hau hanoin Abril bele ona, tanba Inspetor halo avaliasaun ba Juiz ida idak,” dehan nia.
Hatutan, kuandu iha fulan Abril rezultadu inspesaun nian iha ona, maka sei iha reuniaun ida atu haree promosaun ba Juiz neebe ba iha primera klase, no segunda klase, inklui mos Juiz foun sira neebe halao hela estajiu.
Esplika tan iha ona reuniaun mak foin relata ba iha Prezidente Republika.
(ter)
