DILI, STLTIMORLESTE.com – Major Jeneral Andrew J. Chevalier husi Guarda Nasional Rhode Island Estadus Unidus Amerika Vizita Timor Leste (TL), hodi avansa parseria Estadus Unidus Amerika no TL.
Husi loron 29 Marsu too loron 2 Abríl 2026, Major Jeneral Andrew J. Chevalier, Adjuntu Jeral Guarda Nasional Rhode Island nian, vizita Dili hodi hasoru malu ho Timor-Leste nia líder nasional no instituisaun sira.
Vizita nee haree liu ba hasae kooperasaun seguransa bilateral, kapasidade asistensia umanitaria no fo tulun iha dezastre, no inisiativa edukasional hirak liuhusi Programa Parseria Estadual ho Rhode Island.
Durante ninia vizita, Major Jeneral Chevalier hasoru malu ho Prezidente Ramos-Horta, Primeiru Ministru Xanana Gusmão, Ministru Defeza, Xefe Estadu Maior Jeneral F-FDTL, no Sekretariu Estadu Protesaun Sivíl hodi koalia kona-ba hametin kooperasaun seguransa bilateral, hasae kapasidade resposta ba dezastre no asistensia umanitaria, no habelar oportunidade dezenvolvimentu edukasional no profisional.
Konversa hirak-nee haree liu ba hadia koordenasaun no resposta entre ajensia seguransa no emerjensia Timor-Leste nian, avansa programa formasaun no interkambiu hamutuk, no promove estabilidade no reziliensia rejional iha Indo-Pasífiku.
Major Jeneral Chevalier mos hamutuk ho ofisial governu sira iha serimonia lansamentu ba instalasaun Timor-Leste nia Rede Komunikasaun Radiu Emerjensia Nasional dahuluk, marku istoriku ida neebe sei hametin komunikasaun no koordenasaun entre Polísia Nasional Timor-Leste, Ajensia Protesaun Sivíl, F-FDTL, no servisu ambulansia nian.
Aleinde nee, Major Jeneral Chevalier halo mos vizita ba Muzeu Rezistensia no Universidade Nasional Timor-Leste, koalia ho estudante sira, profisional sira neebe foin hahú kareira, no ofisial militar sira hodi destaka importansia husi edukasaun no dezenvolvimentu profisional.
Vizita Major Jeneral Chevalier nian nee reforsa parseria kleur ona entre Estadus Unidus Amerika no Timor-Leste, hodi hatudu kompromisu hamutuk ba seguransa, reziliensia, no prosperidade iha rejiaun Indo-Pasífiku.
No ohin loron Segunda 30/03/2026 Major Jeneral Chevalier halo enkontru ho Prezidente Republika Jose Ramos Horta iha palasiu Prezidensia Nicolau Lobato hodi hametin lazu amizade.
Major Jeneral Andrew J. Chevalier Adjuntu Jeral, Rhode Island serbisu nuudar Adjuntu Jeral no Komandante Jeral Guarda Nasional Rhode Island nian, responsavel ba bem-estar, prontidaun, no operasaun hirak husi soldadu no aviador nain 3,100 resin. Nia hetan nomeasaun ofisial iha tinan 1990 liuhusi Universidade Rhode Island nia programa ROTC ba Ezersitu no serbisu ona iha nível lideransa hotu-hotu, inklui destakamentu oioin ba Irake no Kuwait. Nia iha lisensiatura iha administrasaun negosiu husi Universidade Rhode Island no mestradu iha Seguransa Nasional no Estudus Estratejiku husi Kolejiu Funu Naval Estadus Unidus nian. Nia líder ida neebe iha esperiensia ho dekada barak, Major Jeneral Chevalier mos halao ona papel importante sira iha resposta interajensia nian ba dezastre, formasaun, no mentorizasaun ba jerasaun tuirmai líder militar no sivíl sira.
(eme)
