BAUKAU, STLTIMORLESTE.com – Estrada diresaun husi Suku Tirilolo ba Suku Buruma neebe diresaun liu husi Suku Kaibada Makasae, Postu Administrativu Baukau Vila, Munisipiu Baukau, kondisaun aat.
Xefe Suku Kaibada Makasae, Julio Alegria Belo esplika, diresaun estrada husi Suku Tirilolo ba Suku Buruma diresaun liu husi Suku Kaibada Makasae konstrui iha tempu okupasaun Indonezia, neebe nuudar dalan alternativu ba movimentasaun transporte publiku no privadu diresaun husi Munisipiu Lautem no Postu Administrativu Laga, Baguia, Kelikai Antigu, Matebian inklui Postu Administrativu Kelikai no nuudar dalan uniku ba komunidade husi Suku Kaibada Makasae durante nee asesu lori produtu lokal ba merkadoria, maibe daudaun kondisaun aat hodi difikulta komunidade sira nia movimentasaun ho transporte publiku no privadu.
“Estrada nee husi tempu okupasaun Indonezia too agora alkatraun mos laiha ona, agora hela mak rai, neebe ita uza transporte motor sei diak, maibe kareta nee ita preokupa tebes,” hateten Xefe Suku Kaibada Makasae, Julio Alegria Belo ba jornalista sira iha Kaibada Makasae, Tersa (31/03/2026).
Nia sublina, mezmu kondisaun estrada refere atual difikulta komunidade sira nia movimentasaun ho transporte sira, maibe nafatin utiliza estrada refere hodi asesu produtu lokal sira ba merkadoria, tanba laiha dalan atertnativu seluk neebe besik liu kompara distansia entre Suku Kaibada Makasae ho merkadu Munisipal Baukau.
Nia fundamenta, kondisaun estrada refere parte Autoridade Suku relata ona ba Servisu Munisipal Obras Publikas Baukau atu halo reabilitasaun, maibe seidauk iha rezultadu.
“Importante tebes ita tenke halo melhoramentu ba estrada ida nee, tanba estrada ida nee fo asesu ba komunidade Kaibada Makasae nia mos nuudar dalan alternativu ba Munisipiu Lautem,” Julio Alegria akresenta.
Hatan ba kestaun nee, Diretor Servisu Munisipal Obras Publikas Baukau, Agostinho Ximenes rekonhese, kondisaun estrada husi diresaun Suku Tirilolo ba Buruma liu husi Suku Kaibada Makasae atual kondisaun aat, tanba nee Servisu Munisipal Obras Publikas Baukau halo levantamentu no relata ona ba Ministeriu atu halo reabilitasaun.
“Ida nee lista tama ona iha estrada urbana neebe ida nee sei planu karik 2027 nee ita nia Ministeriu bele tau matan ona,” katak Agostinho Ximenes.
Entretantu diresaun estrada husi Suku Tirilolo ba Buruma liu husi Suku Kaibada Makasae hamutuk kilometru 3 neebe atual fo asesu ba komunidade sira iha Suku Kaibada Makasae ho total populasaun hamutuk nain 2.160 husi uma kain 529.
(tom)
